Punjnud.com

          ایک ابہام اس وقت جنم لیتا ہے جب مصنف پر خود بھی اس کا مافی الضمیرواضح نہیں ہوتا۔ میراجی کی نظم ’’طالب علم‘‘ ایسے ابہام کی مثال ہے۔ اس نظم کے ابتدائی مصرعوں میں جن کرداروں کو متعارف کروا کرشعری تجربے کے ابلاغ کی کوشش کی گئی ہے۔ ان میں فکری و معنوی سطح پر کئی بعد شاعر کی منتشر خیالی کی نشاندہی کرتے ہیں۔ نظم کے اختتام تک شاعر خود اس بات سے ناواقف ہو جاتا ہے کہ آخر وہ کہنا کیا چاہتا ہے۔ بنیادی متن میں بہت سے ذیلی متون کی شمولیت سے ابہام جنم لیتا ہے اور نظم کا ابلاغ شاعر کی ذہنی پیچیدگیوں اور الجھنوں کی نذر ہو جاتا ہے۔

          ایک قسم کا ابہام اس وقت پیدا ہوتا ہے جب کچھ ایسے خیالات تخلیق کار کے ذہن کو اپنی گرفت میں لے لیتے ہیں جو دورانِ تخلیق اس وقت ظہور پذیر ہوتے ہیں جب تخلیق کار کا ذہن فوری طور پر ان کی ترسیل کے لیے آمادہ نہیں ہوتا۔ میراجی کی نظم’’تن آسانی‘‘ میں اس قسم کا ابہام ہے۔

          بعض اوقات دو یا دو سے زیادہ متبادل معنی کی یکجائی متن کی تفہیم میںدشواری کا سبب بنتی ہے اور ابہام جنم لیتا ہے۔ میراجی کی نظم ’’ایک تھی عورت‘‘ میں اس قسم کا ابہام موجود ہے۔ اس نظم میں میراجی نے اپنی قوت متخیلہ کو بروئے کار لاتے ہوئے چند ایسی بصری تمثالیں وضع کی ہیں جن کے ذریعے دو سے زیادہ متبادل معنی کی یکجائی نظم میں ابہام کا پیشِ خیمہ ثابت ہوئی ہے۔ اس قسم کا ابہام قاری کو ایک تناظر میں متن کی تعبیر پر آمادہ کرتا ہے۔

          مضمون کے آخر میں احتشام علی اس نتیجے پر پہنچے ہیں کہ جدید اردو نظم کی شعریات کو اب ایسے نئے تنقیدی پیمانوں پر پرکھنے کی اشد ضرورت ہے جو نظموں کی تفہیم ایک نئے تناظرمیں کر سکیں۔ تنقید کے جدید نظریات اور رجحانات کی روشنی میں میراجی کی نظموں کا مطالعہ میراجی کے علمی وفکری سفر کے نئے منطقے دریافت کرنے کا سبب بھی بنے گا اور ان کے کلام کے ابلاغ کے مسئلے کو بھی حل کرے گا۔ اس طرح میراجی کے کلام کی تفہیم سہل ہو جائے گی اور اس کی معنویت میں اضافہ ہو گا۔

          میراجی کے حوالے سے دونایاب تحریریں بھی اس شمارے کی خصوصی پیش کش ہیں پہلی تحریر ’’تعارف‘‘ کے عنوان سے محمود ہاشمی کی ہے۔ ان کے خیال میں میراجی کی شخصیت میں کئی براعظموں کی ادبی تحریکات، شخصیات اور افکار و خیالات جمع ہیں۔ میراجی، غالب کے بعد فن کی نجات اور نئی زندگی بخشنے  والا، اردو اب کا دوسرا محور ہے۔ اقبال اپنے عروج او رمیراجی اپنے آغاز میں ایک دوسرے کے ہم عصر ہیں لیکن وہ دونوں ایک دوسرے سے ناآشنا رہے۔

          وہ یہ بھی لکھتے ہیں کہ:

’’میراجی کی شخصیت، علامہ کے تناظر میں، بے حد عجیب نظر آتی ہے۔ آنے والی نسل، میراجی کے اسلوب کو، میراجی کے طرزِ احساس کو، میراجی کے نظریہ شعر کو قبول کرتی ہے اور علامہ کا اثر۔۔۔ ان کے اپنےArena (میدان) سے باہر نہیں نکل پاتا علامہ ایک پروقار ’’یادگار‘‘ کانقش بن جاتے ہیں اور میراجی آنے والوں کا ہمسفر۔۔۔ میراجی ہنوز نئے آنے والوں کا ہم سفر ہے۔‘‘(۴۵(

          ان کے مطابق علامہ کے فلسفہ شعر کی بنیاد ایک پوری ملت کے ماضی، حال اور مستقبل پر تھی۔ ان کی شاعری کا کینوس مشرق سے مغرب تک پھیلا ہوا تھا۔ جبکہ میراجی کی شاعری ان کی شخصیت کا عریاں اظہار ہے اور اس کا کینوس بادی النظر میںبہت وسعت بھی نہیں رکھتا۔

          محمود ہاشمی ایک سوال اٹھاتے ہیں کہ میراجی میںوہ کون سی پر پُراسرار قوت ہے، جو آج کی شاعری سے، اس کے رشتے کو کمزور نہیںہونے دیتی؟وہ خود ہی جواب بھی دیتے ہیں کہ آج کے جدید ذہن او رعمومی بورژ وا معاشرتی فکر کے درمیان جو کش مکش ہے اسی کش مکش کا محور، میراجی کی ذات ہے۔ اُن کی شاعری اسی کش مکش میں اظہار کی علامتی کامیابی کو نمایاں کرتی ہے اور یہ رشتہ اس وقت تک کمزور نہیں ہو سکتا جب تک تخلیق کو آزادانہ اظہار تصور کیا جا تا رہے گا۔

          دوسری تحریر اخلاق احمد دہلوی (میراجی کے دوست) کی لاہور کے ڈاکٹر اے۔ ڈی۔ فرزوق سے اتفاقیہ ملاقات کے دوران گفتگو ہے۔ اے ڈی۔ فرزوق میراجی کے کلاس فیلو تھے۔ اس گفتگو کا ذکر اخلاق احمد دہلوی نے اپنے مضمون ’’میراجی کا اخلاق‘‘ میں بھی تفصیلاً کیا ہے۔ ڈاکٹر رشید امجد نے بھی اپنی کتاب ’’میراجی شخصیت اور فن‘‘ میں اس کا ذکر تفصیل کے ساتھ کیا ہے۔

          اس کے بعد جدید ادب (میراجی نمبر) پر مختلف تبصرے ہیں۔ عبداللّٰہ جاوید کا تبصرہ سب سے بھرپور ہے۔ ڈاکٹر محمد شفیع چوبدار کا تبصرہ بھی خاصے کی چیز ہے۔ عامر سہیل، مدثر بلال اور ارشد خالد کے تبصرے مختصر لیکن جاندار ہیں۔ انگریزی میںڈاکٹر امجد پرویز کا تبصرہ بھی پڑھنے کے لائق ہے۔

          شعبۂ اردو پنجاب یونیورسٹی لاہور کی جانب سے فیض صدی اور میراجی صدی کے سلسلے میں ایک روزہ قومی سیمینار کی روداد اقراء اسلم اور مدثر جمیل نے تحریر کی ہے۔ عالمی اردو کانفرنس کراچی کے زیرِ اہتمام میراجی سیشن ہوا۔ اس سیشن کی رپورٹس بھی اس شمارے میں شامل ہیں۔

          ’’حقیقت حال‘‘ کے عنوان سے جو حصہ ’’نایاب‘‘ میں شامل ہے۔ اس میں ایک مضمون ’’میراجی جنسی مریض یا جینیئس‘‘ کے عنوان سے ظفر سید کا ہے۔ یہ مضمون بی بی سی کی ویب سائٹ پر ۲۵ دسمبر ۲۰۱۲ء میں شائع ہوا۔ یہی مضمون ۲۷ دسمبر ۲۰۱۲ء کو دہلی کے روزنامہ ہمارا مقصد نے شائع کیا۔

          اس مضمون میں وہ لکھتے ہیں:

’’دو ہزار دس فیض صدی تھی۔ دو ہزار گیارہ راشد صدی،  دو ہزار بارہ منٹو صدی۔ اس دوران اردو کے ان گراں ڈیلوں پر درجنوں کتابیں تحقیقی و تنقیدی کتابیں چھاپی گئیں، پُر مغز سیمینار اور کانفرنسیں منعقد کی گئیں، الیکٹرانک میڈیا نے خصوصی پروگرام ترتیب دیے، ادبی رسالوں نے خاص نمبر چھاپے۔

لیکن اس تمام ہائو ہو میں کسی کو ایک نام یاد ہی نہ رہا، یا اگر یاد بھی رہا تو محض سر سے بوجھ اتار نے کی مانند۔ وہ نام جس نے اردو میں جدیدیت کی داغ بیل ڈالی۔۔۔ یہ میراجی ہیں۔‘‘(۴۶(

          میراجی صدی کے آغاز سے پہلے ہی میراجی پر کام ہونا شروع ہو گیا تھا۔ وہ کام سر سے بوجھ اتارنے کی مانند نہیں بلکہ سچے دل سے ہونے لگا تھا۔ ’’عکاس‘‘ انٹرنیشنل اسلام آباد کے شمارہ ۱۴ میں مطالعۂ خاص کے عنوان سے میراجی کا ایک مختصر مگر عمدہ گوشہ (ستمبر ۲۰۱۱ء میں) ارشد خالد صاحب نے شائع کیا۔ ۲۰۱۱ء میں میراجی صدی شروع ہونے سے پہلے انٹرنیٹ پر ایک بلاگ قائم کیا گیا۔