(Last Updated On: )
اُن جھیل سی گہری آنکھوں میں اک شام کہیں آباد تو ہو
پھر چاہے عُمر سمندر کی
ہر موج پریشاں ہو جائے
پھر چاہے آنکھ دریچے سے
ہر خواب گریزاں ہو جائے
پھر چاہے پھول کے چہرے کا
ہر درد نمایاں ہو جائے
اُس جھیل کنارے پل دو پل
وہ روپ نگر ایجاد تو ہو
دن رات کے اس آئینے سے وہ عکس کبھی آزاد تو ہو
اُن جھیل سی گہری آنکھوں میں اک شام کہیں آباد تو ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ بھی یقیناً امجد اسلام امجد کی شاعری کے سحر میں کھو گئے ہوں گے۔
آنکھیں۔۔۔۔ اور جھیل سی گہری آنکھیں۔۔۔۔۔ شاعر کو اپنے حصار میں لے ہی لیتی ہیں۔
لیکن ان خوبصورت آنکھوں کے گرد سیاہ حلقے ہوں تو سارا حسن سوگواری میں ڈھل جاتا ہے۔۔۔۔۔۔۔۔۔ اگرچہ سوگواری کا بھی اپنا ہی حسن ہے۔
۔۔۔۔۔۔۔۔۔۔۔۔۔۔۔۔۔۔۔۔
اب ذرا شاعری کے موڈ سے باہر نکل آئیے۔۔۔۔۔ ہم آپ کو بتائیں گے کہ اگر آپ کی حسین آنکھوں کے گرد سیاہ حلقے ہیں تو، ان کی سائنسی وجوہات کیا ہیں؟ کون کون سے گھریلو ٹوٹکے ان پر کارگر پائے گئے ہیں؟ اور میڈیکل سائنس میں ان کا کیا علاج ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
🔹سیاہ حلقوں کی وجوہات🔹
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔ آنکھ کی زیریں جلد میں موجود خون کی باریک شریانوں کا سکڑ جانا ان کی بہت بڑی وجہ ہے، کیونکہ اس سے جلد میں پگمنٹس کی شدت بڑھنے لگتی ہے۔
2۔ عمر کے بڑھنے کے ساتھ زیرِ چشم جلد پتلی ہونا شروع ہو جاتی ہے، جس سے یہ سیاہی مائل دکھائی دیتی ہے۔
3۔ نیند کی کمی
4۔ الرجی
5۔ جلد میں میلانین کی ایک حد سے زیادہ تشکیل۔
6۔ سورج کی روشنی کا زیادہ سامنا کرنا۔
7۔ آئرن کی کمی سے ہونے والا اینیمیا Anaemia
8۔ آنکھ کو بار بار مسلنا۔
9۔ بڑھتی عمر
10۔ تمباکو نوشی
11۔ جسم میں پانی کی کمی
12۔ جِلدی انفیکشن
13۔ بعض افراد میں موروثی سیاہ حلقے بھی ہو سکتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
🔹گھریلو ٹوٹکوں کی افادیت🔹
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بہت سے گھریلو ٹوٹکے، اگرچہ میڈیکل لحاظ سے ثابت شدہ نہیں مگر یہ کافی اثر رکھتے ہیں۔ یہ درج ذیل ہیں۔
1۔ سات سے آٹھ گھنٹے کی پر سکون نیند
2۔ آنکھیں بند کر کے پندرہ منٹ تک ان پر کھیرے کی قاشیں رکھنا خاصہ مفید ہے۔ کھیرے میں پانی، وٹامن سی اور سلیکا ہوتا ہے جو صحتمند بافتوں کے لئے ضروری ہے۔
3۔ رومال میں برف کے ٹکڑے لے کر آنکھوں کے نیچے لگانے سے بھی سیاہ حلقے ٹھیک ہو جاتے ہیں۔
4۔ ٹی بیگز بھگو کر بند آنکھوں پر رکھنا بہت فائدہ مند ہے، کیونکہ یہ خون کی گردش کو بہتر کرتے ہیں۔
5۔ آنکھوں کے گرد بڑی نفاست سے کوکونٹ یا زیتون کے تیل سے مساج کرنے سے بھی سیاہ حلقے کم ہو جاتے ہیں۔
6۔ پانی زیادہ پینے سے بھی فائدہ ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
🔹میڈیکل ٹریٹمنٹ🔹
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔ ایسی کریمیں جن میں hydroquinone یا tretinoin یا دونوں ہوں، اگر تین ماہ تک جلد پر استعمال کی جائیں تو کافی فرق پڑ سکتا ہے۔ مگر یہ ڈاکٹر کے معائنے اور مشاورت سے ہی استعمال کریں۔
2۔ کوجک ایسڈ kojic acid کے استعمال سے بھی حلقے دور ہو جاتے ہیں۔
3۔ وٹامن سی کا جِلدی استعمال بھی مفید ہے۔
4۔ اب لیزر تھیراپی بھی متعارف ہو چکی ہے۔ مگر اس کے نقصانات بھی ہو سکتے ہیں۔
