(Last Updated On: )
الطاف ملک ( رحیم یار خان)
شاعری کہیں وی تہذیب دے لینڈ اسکیپ (جغرافیہ، پہاڑ، دریا، پکھیڑو، رستے وغیرہ)، اوندی معاشرت(رہن سہن، رسم و رواج، آپس اچ تعلقات)، اوندے سیاسی حالات تے لوکیں دے خاص مزاج(جمالیاتی ذوق) دا اولڑاں ہوندی اے۔ تُساں کہیں وی دَور دی شاعری پڑھو تاں اُوں دَور دی تہذیب دی ہِک مکمل تے ٹُردی پِھردی تصویر ڈیکھ سگدو۔ جتھاں تک گالھ غزل دی ہے۔ تاں او قصیدے توں نکل تے عربی گھوڑیاں تے پندھ کریندی، فارسی جنگیں دے میدانیں تو ںتھیندی ہوئی، مُغلیں دی سرپرستی اِچ اساں کنیں پجی ‘تاں ڈوہڑہ تے کافی لکھن آلے لوکاں کیتے ہک اوپری چیز ہئی۔ اوپری کیوں نہ ہووے جو ہک ایجھے مزاج دے لوک،جہڑے جو کئی سو سالیں کنوں مسلسل حملہ آوریں دے حملے جھلیے ہوون، نہ انہاں ہتھیار بنڑائے ہوون نہ انہاں حملے کیتے ہوون تے انہاں دا ہک ایجھی صنف نال واسطہ پووے جہڑی انہاں دے مزاج نل میل نہ کھاوے ۔ لیکن باقی زباناں دی ڈیکھا ڈیکھی اساں وی اے پندھ شروع کر ڈتا۔ لیکن سرائیکی وسیب جہڑا جو حملہ آوریں کوں دل وڈا کر تے جھاہ ڈیندے او ایں غزل کوں اج تئیں اونویں جھاہ نہ ڈے سگیا ۔
غزل دے بنیادی اجزاء اوندی تشبیہات، تلمیحات، اوندے استعارے تے کہیں شاعر دا اسلوب ہوندے جہڑا جو اوں کوں باقی شاعراں توں نشابر کریندے۔ ہر شاعر دا ہک وکھرا ماحول ہوندے جیں وچ رہ تے او غزل دی زمین بنڑیندے، تشبیہ گھڑیندے تے استعارے استعمال کریندے۔ اوندے قافیے تے ردیف تے اوندا مخصوص لہجہ قاری کوں ڈسیندے جو اے شعر فلانے شاعر دا ہوسی۔ لیکن اساڈی غزل وچ گنتی دے کجھ شاعراں تو علاوہ کوئی قابل ذکر اسلوب سامنھیں کینی آیا۔ اے گالھ نہ صرف موضوعاتی اعتبار نال سچی ہے بلکہ اوندی ہیئت تے تکنیکی اعتبار نال وی سچی ہے۔ کہیں وی سرائیکی شاعر دی غزل دا شعر پڑھ گھنو مضمون دے حوالے نال وی تے تکنیک دے حوالے نال وی اوندے وچ ہکو جیہا ماحول ہوسی تے رَلدے مِلدے رنگ اچ رنگی غزل یا شعر ہوسی۔ گنتی تے پنج مضمون تے ست استعارے ہن جیں وچ بھن تروڑ کر تے شاعر بنڑئے کھڑن، مصرعے دی بنت تے قافیہ ردیف دے انتخاب دے معاملے اچ وی تقریبا ہکو جیہے اجتماعی تجربے توں گزردے پن۔ تقریباً سارے سرائیکی شاعر کلیشے در کلیشے کر تے پتا نی جو کیوں غزل دی سائیکل کوں سٹینڈ تے کھڑا تے پیڈل چلائی پن۔ ول کوئی نواں شاعر جہڑا جو اجوکی اردو غزل توں متاثر تھی تے کوئی وکھرا کم کرن دی کوشش کرے وی سہی تاں سینئر شاعر حوصلہ افزائی تاں ہک پاسے اُلٹا لتاں چھکیندے۔
مضمون تے تکنیک دے معاملے اچ کوئی وکھرا رنگ اگر کہیں دا ہے تاں سئیں رفعت عباس ہن۔ سرائیکی غزل دا ہک بیا ناں، جہڑا جو زیادہ سامھیں نی آ سگیا او رفیق احمد پوری صاحب دا ہے۔ تے نویں شاعراں وچوں نویاں زمیناں تے نویں تکنیک دے حوالے نال نویں ناں بلال باقر تے مژدم خان دے ہن۔
ڈاکٹر سلیم اختر دے مطابق کہیں وی علاقے دے سیاسی حالات تے اوندی غزل (شاعری) ہک بئے نال معکوس عمل اچ رہندن۔ مطلب اگر سیاسی حالات خراب ان تاں غزل دا پندھ چنگا ہوسی تے اگر حالات ٹھیک ہن تاں غزل دی فکری پرواز بہوں گھٹ ہوسی۔ اساڈی مظلوم سرائیکی قوم جہڑی جو کئی ہزار سالیں توں مسلسل حملہ آوریں دی زد اچ ہے ہوں دے باوجود اساڈی غزل اچ ہک سیاسی شعور تے فکری پندھ ناں ہوون دے برابر ہے یا اگر انہاں دا سیاسی شعور نظردا وی ہے تاں گالھ چھڑا سرائیکستان تک ویندی ہے۔ نوآبادیاتی دور وچ برصغیر اچ کوئی سیاسی ڈھانچہ کہیں حد تک بیرونی دباو توں آزاد ریہے تاں او ریاست بہاولپور ہئی(ہیں دے باوجود اساں کوئی ایجھی سیاسی پارٹی نی بنڑا سگئے جہڑی قومی سطح تے اساڈی نمائندگی کر سگدی ہووے۔۔۔ خیر) تے اے ریاست خواجہ صاحب دی سرپرستی کر تے ثابت وی کیتا جو اے براہ راست ادب دی سرپرستی کریندی پئی ہے لیکن ول وی اے ماحول اساڈی غزل دی ہوں طرح دی تربیت نی کر سگیا جیندے وچ اے صنف اساڈے ورثے کوں محفوظ کر سگدی۔ہیں دی وجہ اے وی ہے جو اساڈے شاعر کیچ، روہی، سرخی، مساگ، یا اساڈی محرومی دے چورن توں علاوہ کجھ نی ویچ سگے۔ اساڈے شاعر سرائیکستان دے حق اچ تے تختِ لاہور دے خلاف، وڈیرے کوں مندے تے گودے کوں تڑیاں ڈیون دا ناں انقلاب رکھے چا تے اساڈے مشاعرے دے جزباتی سامع انہاں کوں اتنا پروٹوکول دتے جو انہاں شاعراں اگی تے کجھ نی سوچا۔ کجھ دوستاں اللہ سئیں نال شکوہ کرن تے ہک ڈو گنتی دے مضمونیں دے ضابطے اپنے حق اچ منظور کروا تے خود کوں ‘مزاحمتی غزل گو’ دا لیبل ڈے چھوڑے۔ لیکن اگر انہاں تے غور کیتا ونجے تاں نام نہاد مزاحمت تے انقلاب دے مضموناں توں بعد انہاں شاعراں دے وی بچدا اوہو کجل، مساگ، تے بقیہ چار مضمون ہن۔ لیکن ہیں لسٹ اچ اشو لال، رفعت عباس تے کچھ بئے اگواناں دا ناں نہ گھنن نا انصافی ہوسی جنہاں ہک نویں تے مکمل جمہوری سیاسی شعور دی گالھ کیتی ہے تے مزاحمت دی حقیقی روح انہاں دی شاعری اچ نظر امدی ہے۔
جیویں میں پہلے عرض کیتی جو کئی وی شاعر سب توں پہلے اپنے ارد گرد کوں غزل دا حصہ بنڑیندے یعنی لینڈ اسکیپ براہ راست شاعر دا مشاہدہ ہوندے۔جیویں احمد خان طارق اپنے دوہڑے وچ بیٹ کوں امر کر چھوڑے تے اینویں ہی خواجہ سئیں کافی وچ روہی وسا چھوڑی اے۔ اشو سرکار دا کلام سندھو سئیں دے پانی وچ گھلیا نظردے۔ لیکن گالھ غزل دی کروں تاں اینیوں لگدے جو اساڈا لینڈ اسکیپ چھڑی پیلو، لئی لانے، سَر، ٹالھیاں تے روہی توں علاوہ ودھ ہی نی سگیا۔، جہڑا نواں شاعر غزل آکھدے او اپنی روایت دے پیریں تے ٹردے ہوئیں گالھ بیٹ توں شروع کریندے تے گھر دی ٹالھی تے آن ختم کریندے۔ کیا اساڈے وسیب اچ ٹوٹل استعارے ایہو ہن؟ اساڈی اساطیر جہڑی جو قصے دی صورت اچ سینہ بہ سینہ اساں کنے پجی اے۔ لیکن اگر اساں اپنی شاعری وچ ڈیکھوں تاں یا ہندو اساطیر یا بدھ مت دی اساطیر نظردی ہے کیا اساڈی مقامی اساطیر صرف ایہا ہے؟لینڈ اسکیپ دے حوالے نال پوری سرائیکی غزل اچ گنتی دیاں ست چیزاں ہن جیں کوں اساڈے شاعر لکھ لکھ تے ایہو ثابت کریندے پن جو اساڈا اجتماعی تجربہ وی بس ایہے ست اٹھ گالھیں ہن۔ اگر کوئی نواں شاعر کجھ نویں چیز لکھن دی کوشش کرے تاں کیفیت توں خالی کر تے فضول شاعری دا ٹھپا لاڈتا ویندے۔ شاید اوں دی وجہ اے ہے جو نویں شاعری (جہڑی بہوں گھٹ مقدار اچ تھیندی پئی ہے) نال پرانے شاعراں کیتے شاعری مشکل تھیندی ویندی ہے۔اے گالھ منن اچ کیہا شرم اے جو اساڈی شعری روایت اردو شعری روایت توں ڈھیر پچھی تے کھڑی اے، اتے فارسی روایت تاںول اردو توں وی اگی تے نظردی ہے۔ کوئی وی زبان یا اوندا ادب اگر اساڈے مذہبی، تہذیبی، ثقافتی،ادبی تے جمالی ذوق تے پورا اتردے تاں اساں کوں ہوں تو متاثر تھیون توں کون روک سگدے؟ اگر اساں ایں وڈیاں روایتاں توں متاثر تھیووں یا انہاں تو کئی وی تکنیکی فائدہ چاون دی کوشش کروں تاں اے اساڈی غزل کیتے فائدہ مند ہوسی۔ لیکن اساڈی غزل گو دا مطالعہ اوں معیار دا کائنی یا او ادب اوں کوں متاثر نی کریندا کیوں جو اساڈے شاعر دے ذوق دی تربیت ہی اساڈی آپنی غزل نال تھئی ہیں سانگھے اردو ادب دی غزل تے تھیوں آلے تجربات سرائیکی تے براہ راست کرن توں ڈرد یا کر نی سگدا۔ اگر کوئی کرے وی سہی تاں اساڈا سینئر تے قاری ہوں کوں قبول نی کریندا لیکن اے تجربات کہیں نہ کہیں کوں تاں کرنے پوسن ناں اگر کہیں بئی روایت دے تجربات دا فائدہ نی چیندے تاں اپنے کوئی تجربات کرو، ایں وی موت پمدی اے۔ اردو غزل پچھلے کئی ڈہاکیں توں مسلسل تجربات دے پندھ کریندی پئی ہے تے ہر ڈہاکے دے شاعر اسلوبی سطح تے، تے موضوعاتی سطح تے نت نویں تجربات کریندے پن۔ جدید میڈیا یعنی فیس بک اساڈے تے انہاں شاعراں دے درمیان ہک پُل داکم کریندا پے تے اساکوں نویں شاعری مل ویندی ہے۔ ہُن تلازمے دی حد تک اساڈے کجھ شاعریں اردو غزل توں متاثر تھی تے کم کریندے پن جہڑی جو حبس دے اچ ہوا دا جھولا ہے۔ نال کجھ انگریزی دے الفاظ وی سرائیکی غزل اچ جدت دے ناں تے استعمال تھیندے پن، اگر او الفاظ غزل اچ فٹ تھیندن تاں بسم اللہ نئیں تے بھرتی نہ ہی کرو تاں چنگا ہے۔ اکھیندن زبان سمندر آلی کار ہوندی ہے جہڑی جو مردہ الفاظ کوں خود بہ خود باہر بھکا مریندی ہے۔ اگر کوئی زندہ لفظ ہوسی تاں او زبان دا حصہ بن ویسی۔ اینویں ہی میڈے کجھ دوستاں ہک نویں اصطلاح متعارف کروائی ہے او ہے ”اردوائی غزل” ایندامطلب ایجھے مصرعے لکھن جیں دا ہک لفظ اَگی تے پچھی تے کرن یا اونکوں تبدیل کون نال او پورا مصرع اردو دے مصرعے وچ تبدیل تھی ونجے۔ اے لسانی تجربہ یا غزل اچ جادو تاں تھی سگدے لیکن اے سرائیکی غزل واسطے نقصان ہی ہوسے۔ ویسے کجھ شاعر ایں کوں ہک فن سمجھدن شاید انہاں دی تربیت ڈو سینئر شاعر اں دی غزلاں نال تھئی ہووے جنہاں دی شاعری وچ اردو تراکیب بلکہ فارسی تراکیباں وی استعمال تھن ۔ مغربی ادبی تھیوریاں جیندے وچ جدیدیت، مابعد جدیدیت، ساختیات، پس ساختیات، رومانویت وغیرہ ہن۔ اگر انہاں دی گالھ کروں تاں ہیں دے وچ کوئی شک کینی جو او ا جہڑے ماحول اچ پیدا تھن اوندے زمینی حقائق اساڈے زمینی حقائق توں بالکل مختلف ہن بلکہ الٹ ہن، انہاں دی پرورش جہڑے وسائل، مسائل، حالات تے جہڑی قوم دے ہتھیں اچ تھی اے او اساں کنوں ڈھیر زیادہ مختلف ہن لہذا اساں ہیں کوں کینی منیدے(اشو سئیں دا انٹرویو ہیں گالھ تے دلیل ہے)۔ گالھ اے ہے جو سرائیکی ادب جہڑا فی الحال روایتی تنقیدتوں وی ‘پاک ‘ہے او انہاں اصطلاحات دا بار کینویں چا سگدے؟؟ نہ ہی اساڈے شاعر، قاری نہ ہی اساڈے نقاد دی تربیت ایجھی ہے جو اساڈی تخلیق کوں انہاں تے پرکھ سگے لیکن سوال اے ہے جو اگر اساڈی تخلیق انہاں وچوں کہیں تنقیدی اصطلاح تے پوری امدی وی ہے تاں اے اوں تخلیق دا پلس پوائینٹ ہے۔ اساکوں ہوں دی حوصلہ افزائی کرنی چاہیدے اے۔ہیں چیز دے باوجود جو اے اصطلاحاں اساڈیاں اپنیاں کینی۔ میڈا خیال اے جو اے کوئی طریقہ کینی جو اساں اینکوں صرف ہیں گالھ تے ردکروں جو انہاں دا ظہور کہیں بئے پاسے تھئے۔انہاں تھیوریاں توں انکار اینویں ہے جینویں بلی کوں ڈیکھ تے کبوتر اکھیں موٹ بہوے۔اساڈے شاعر دی انہاں تے عمل کرن یا نہ کرن دا معاملہ ذاتی ہے لیکن بنیادی واقفیت (میڈے خیال اچ) لازمی ہے۔
متن تے معنے دی بحث تاں ہوں ویلھے کریسوں جڈاں اساڈی اجوکی غزل پندھ کریسی تے اساکوں نت نویں تجربے ڈیکھن کوں ملسن۔ اساں کجھ نویں موضوع تے نویں اسلوب سرائیکی غزل اچ متعارف کریسیوں یا کم سے کم کلیشے توں باہر نکلسوں۔ گالھ اتنی وی کینی جو اساڈی غزل بالکل پچھی تے ہے تے ایں اُتے کوئی کم کینی تھیندا پیا، کجھ نویں دوست غزل تے بہوں سوہناں کم کریندے پن تے امید ہے جو اے ڈہاکہ اساڈی پرانی تے نویں غزل اچ ہک موڑ ثابت تھیسی لیکن جہڑے اساڈیسینئر ایہے تجربات نی کر سگدے انہاں توں ہتھ جوڑ تے معافی ہے جو ادبی نا انصافی نہ کرن تے حوصلہ افزائی کر تے غزل دا اے پندھ اگی تے ودھن دیون۔ میں پورے مضمون اچ رفعت سئیں، اشو سئیں تے احمد خان طارق دے ناں توں علاوہ نہ کہیں شاعر دوست دا ناں گدھے تے ناں ہی حوالے دا شعر کوٹ کیتے اے گالھ تنقیدی اصولاں دے خلاف ہے۔ لیکن اے کم فی الحال میں مضمون کوں لمبا نہ کرن سانگھے تے کہیں حد تک یاریاں بچاون سانگھے کیتم، اگلی دفعہ ساریاں گالھیں دا حوالہ وی شاعری نال ڈیساں۔میکوں اپنی کم علمی دا وی پتا ہے لیکن اے میڈی اپنی رائے ہے جہڑی جو میں قائم کیتی ہے ایندی مخالفت میں کھلے دل نال قبول کریساں تے اگر میں غلط ہویم تاں اپنی اصلاح وی ریساں، قلم چئو، بسم اللہ کرو۔ ٭٭٭