(Last Updated On: )
اوہ دین جد نواز گنہگار کہن بس
بس اک نظر نیں ویکھدے بیمار کہن بس
آقا وچھار دین جدوں پیریں چادراں
کلمہ پڑھیندے رون تے سردار کہن بس
اوہ اک پیالے نال وی ستر رجوندے نیں
پی کے ابوہریرہ طلب گار کہن بس
مازاغ دی نظر جدوں اوندی اے جوش وچ
پھر تے عمر وی چھوڑ کے تلوار کہن بس
لوکیں ہزار مکر کرن ، پر فقیر تے
تیرے کرم نوں ویکھ کے ہر وار کہن بس
نئیں بس کریندے یار دی تعریف کردے یار
پر ویکھ کے حضور نوں سبھ یار کہن بس
اعجازؔ کی تے نعت کی تک آپ دا کرم
سٹ کے قلم غزل دے قلمکار کہن بس
