(Last Updated On: )
سوہنے دی محفل کر چھڈدی بہوں دور بلاواں دا مجمع
جد نعت دا دیوا بلدا اے نس جاندا واواں دا مجمع
جد حشر دیہاڑے نوں ساقی اک جھات کرم دی پونی اے
اک جام دے نال رجا دینا مئے خار نگاہواں دا مجمع
جد رحمت کملی والے دی آ مجرم کول کھلوندی اے
بانہیں کھلیاں کر کے نس جاندا پھر سخت سزاواں دا مجمع
اک نظر کرم دی کر دیویں دکھ سکھ اک دوجے دے ونڈیے
مر جاوے کاں تے لگ جاندا اس کاں تے کاواں دا مجمع
بس مان مِرا توں لجپالا اتبار نہ جگ تے بھورا وی
ایتھے کھوہ وچ یوسف نوں سٹدا بے درد بھراواں دا مجمع
اس دل وچ ساری دھرتی دے دکھ درد کریما دفنیجے
دیہنہ راتیں فاتحہ پڑھدا اے رو رو کے ساہواں دا مجمع
جو در وی میرے آقا دی اعجازؔ نظر وچ آ جاندا
اس در تے لگیا رہندا اے نت مست گداواں دا مجمع
