(Last Updated On: مارچ 6, 2023)
تِری جُدائی کا سینے پہ بار بھی نہیں ہے
بہت دِنوں سے تِرا انتظار بھی نہیں ہے
اُچھال دی ہے تِری آرزُو جہاں کی طرف
دِل و نظر پہ مگر اختیار بھی نہیں ہے
بنا لیا ہے اُسے ہم نے ہم سفر جِس پر
ذرا یقیں بھی نہیں اعتبار بھی نہیں ہے
اُڑائی ہم نے بہت خاک کُوئے جاناں کی
طلب زدوں میں ہمارا شُمار بھی نہیں ہے
اُنہی کے حصے میں آئی ہیں منزلیں جن کے
بدن پہ زخم قَبا پر غُبار بھی نہیں ہے
اِسی جہاں کی طلب میں ہیں پھر بھی ہم قائلؔ
کوئی بھی چیز یہاں پائیدار بھی نہیں ہے
۔۔۔۔۔۔۔۔۔۔۔۔۔۔۔۔۔۔۔۔
