نور محمّد نور کپور تھلوی دے ذکر باہجوں فیصل آباد دی پنجابی ادبی تاریخ دا کوئی وی تذکرہ ادھورا ہووے گا ، میں ایہہ لفظ رسمی طور تے نہیں کہے سگوں حقی گل کیتی اے ۔پنجابی ادب نال میرا لکھن پڑھن دا موہ بھاویں 1978ء وچ ہویا’ پر اوس توں پہلاں وی میں فیصل آباد دی پنجابی ادبی محفلاں دے حوالیوں نور محمّد نور کپور تھلوی دا ناں پڑھیا تے سنیا ہویا سی ۔۔۔خاص کر کے 1972ء توں 1975ء دے ورھیاں وچ جدوں میں لائل پور واسی مہان سینما آرٹسٹ قلم کار لائل پوری دی شاگردی وچ چتر کاری دا فن سکھ ریہا ساں ، اوتھوں دے مقامی اخباراں وچ لائل پور دیاں ادبی سر گرمیاں دیاں خبراں تے رپورٹاں وچ نور محمّد نور کپور تھلوی دا ذکر عام طور تے شامل ہوندا سی ۔۔فیر جیویں جیویں ویلا پولے پیریں اگیرے ودھدا ریہا’ نویں لکھاری معروف ناں بن دے گئے تے معروف لکھاری’ حیاتی دے ناٹک وچ اپنا اپنا کردار ادا کر کے منظر توں اوہلے ہوندے گئے’ ایہو حیاتی اے تے کرداراں دی ایہو آوا جاوی حیاتی دے تھیٹر دا سبھ توں وڈا سچ اے’ ایس سچ نوں بھانویں کوئی حیاتی دی رونق جانے تے بھانویں کوئی اداسی سمجھے ۔۔۔مگر میں ایہہ سطراں لکھ دے ہوے اداس ضرور ہاں کہ جدوں مینوں نور محمّد نور کپور تھلوی دے فن بارے کجھ لکھن دا موقع ملیا تے اوہ ساتھوں دور’ بہت دور ‘ کدے مڑ کے نہ آون والے پینڈیاں دے راہی بن چکے ہوے نیں ۔
2011ء دی پہلی تماہی وچ جدوں عزیز مٹر اظہار احمد گلزار ہوراں نے اپنے آدر مانی تایا جان دی لکھت کمائی ” کلیات نور ” مینوں گھلی تے انج جاپیا جویں 1972ء توں 1975ء دا بیتیا زمانہ فیر میرے ساہمنے ان کھلوتا ہووے ۔۔
“کلیات نور” اظہار احمد گلزار ولوں اپنے بزرگاں نال نگھ ، ادب تے عقیدت دا سرناواں تے ہے ہی ،پر جے ذرا موکلی ادبی اکھ نال ویکھیے تاں کہنا پیندا اے ایہہ کتاب فیصل آباد دے پنجابی ادب دی تاریخ دے اک شاندار عہد تے اک جان دار باب نوں چیتے رکھن دی پیاری کوشش وی اے تے ہر موضوع اتے اپنے ان جھک خیالاں دا منظوم اظہار کرن والے نور محمّد نور کپور تھلوی دی پنجابی دی کل لکھت کمائی نوں ورقیاں دی شاندار پوٹلی وچ سانبھن دا سلاہن یوگ جتن وی اے ۔۔۔
” کلیات نور ” دا مطالعہ دسدا اے کہ نور محمّد نور کپور تھلوی ہوریں فکری طور تے اجیہی راہ دے پاندھی سن کہ جتھے ہر ایرے غیرے دا گزران آسانی نال ہونڈا ہووے تے نہ ہی اونہاں دے منظوم خیال کسے رٹی رٹائی تک بندی تے قافیہ پیمائی دے قیدی سن ۔۔بنیادی طور تے اوہناں دے فکری سومے اپنی دھرتی توں پھٹ دے سن ، اپنے دیس نال تے اپنی حیاتی نظریے نال اونہاں دی جڑت بہت پکی سی ۔۔اوہ خالص مسلمان تے خالص پاکستانی سن ، جیہڑا کسے ہور عقیدے ، ملک یاقوم بارے اکا وی تعصب نہیں سی رکھدے ، میں اپنی ایس گل دی گواہی وچ اونہاں دیاں نظماں چوں ۔۔” پاکستان” ، چودہ اگست “، “نانک”، “چھ ستمبر”، “ماں بولی “، ” وارث شاہ” ،” جہیاں خوب صورت نظماں پیش کر سکنا واں ۔۔پر میری جاچے اوہناں دیاں نظماں دا خاص انگ اپنی سماجیات تے ثقافت دے رنگاں بھرے تذکرے نیں ، جنہاں اندر نور محمّد نور کپور تھلوی دا شعوری مطالعہ خاص طور تے اگھڑواں اے ۔۔۔نور محمّد نور کپور تھلوی دیاں اجہیاں نظماں پڑھ کے اندازہ کیتا جا سکدا اے کہ اوہ اپنے سماج دی تاریخ تے ثقافت دے جیوندے جاگدے کرداراں نال کنا نگھ رکھدے سن ۔۔۔مثال دے طور تے نظم ” انبھول” وچ کہندے نیں ۔
پیار کرن توں پہلاں لوکو
جھنگ ول جھاتی مار لیو
۔۔۔۔۔۔۔۔۔۔۔۔۔۔۔۔۔۔۔۔۔۔۔
نظم ” وساکھی” وچ کہندے نیں ۔۔۔۔
بھاگاں نال اجیہے بابے نور کسے نوں مل دے
دل دے باگے اندر مڑ کے پھل خزاں دے کھل دے
۔۔۔۔۔۔۔۔۔۔۔۔۔۔۔۔۔۔۔۔۔۔
نظم ” وساکھی” دا اک بند ویکھو ۔۔
اج کرسان خوشی وچ آیا
جٹ نے ڈھول تے بھنگڑا پایا
کھیتوں بولھ کنک دا چایا
خرچیا مال، اڈاییاں پھکیاں
آئی وساکھی ، کنکاں پکیاں
۔۔۔۔۔۔۔۔۔۔۔۔۔۔۔۔۔۔۔
نور محمّد نور کپور تھلوی دیاں نظماں دا ذکر کر دیاں میرے لئی ممکن نہیں کہ میں ” دو نور جہاناں” نوں نظر انداز کر سکاں ۔۔ایہدی دو وڈی وجوہات نیں ۔۔اک وجہ ایہہ کہ ایہہ نظم اک نویکلے خیال نال منظوم ہوئی اے جیہدے وچ دور دے ماضی دی ملکہ ہند تے نیڑلے ماضی دی ملکہ ترنم دے موازنے دی اوکھت نوں کمال فنی مہارت نال نبھایا گیا اے ۔۔دوسری وجہ ایہہ کہ نور محمّد نور کپور تھلوی ہوریں آپ ماشاء اللہ اک کھاندے پیندے تے رجے پجے خاندانی سن ، ایہدے باوجود اوہناں نے تاجاں تختاں والی ملکہ ہند دی طرف داری کرن دی بجائے اک فن کار دے سچے سوچے فن نوں سچے سوچے اکھراں نال خراج تحسین پیش کر کے اپنے فن دی سچائی ثابت کر دتی ۔۔۔ایس نظم دے بند ملاحظہ کرو:
اِک نور جہان جہانگیر والی ، اِک نور جہان اعجاز والی
جے اوہ نور جہاں سی حُسن والی تے نور جہان آواز والی
ایس نور جہان نے اوس وانگر اُپر کسے دے ظلم کمایا نہیں
اپنے میحل دے بیٹھ جھروکیاں وچ کسے دھوبی تے تیر چلایانہیں
کیہڑا راگ ہے راگ دی لُغت اندر جیہڑا ایس نے سودھ کے گایانہیں
جے اوہ نور جہان سی سوز والی تے ایہہ نور جہان ہے ساز والی
اِک نور جہان جہانگیر والی ، اِک نور جہان اعجاز والی
نظم دا آخری بند تے اوہناں دی فکر دا کھُل کھُلا کے اعلان پیا کردا نظریں آوندا اے ۔۔۔۔۔
جیہڑے وچ مصیبتاں کم آون ‘سکّے بھائیاں دے نالوں اوہ یار چنگے
سونے وچ خوشبو نہ مُول ہووے’ مینوں سونے توں پھُلاں دے ہار چنگے
جیہڑے ہیرے نوں چٹ کے مرن سوہنے’ اوس ہیرے توں لوہے دے تار چنگے
مینوں شاہی چوں خُون دی بو آوے’ بادشاہواں نالوں فن کار چنگے
دیندے کڈھ اُداسیاں دِلاں وچوں’ سرگم چھیڑ دے جدوں آواز والی
اِک نور جہان جہانگیر والی اِک نور جہان اعجاز والی
نور محمّد نور کپور تھلوی دی نظم روانی دے دریا دیاں چھلاں وچ تصوف دے ہلارے وی صاف طور تے نمایاں ہو رہے نیں ، ایس سرناویں ۔۔۔۔۔” میں عشق دا چرخہ ڈاہ بیٹھی “۔۔۔یار دی سک “۔۔۔” سانول موڑ مہاراں “۔۔۔پڑھن نال تعلق رکھدیاں نیں ۔۔
کجھ نظماں چوں مزاحمتی ادبی رویاں دی دس وی پیندی اے ۔۔جنہاں لوکاں نوں فکری سرناویں پاروں نور محمّد نور نے اپنا ادبی رہنما منیا، اونہاں بارے وی شاندار نظماں لکھیاں جویں کہ سید وارث شاہ ، فیض احمد فیض تے سید تنویر بخاری ورگے مہان سوجھوان تے لکھاریاں بارے نظماں ۔
عام طور تے ویکھیا گیا کہ جنہاں دے طبع نظم لئی رواں ہوئی’ اوہناں نوں غزل دا مزاج نبھان وچ اوکڑاں آئیاں تے جیہڑے غزل نال نین ملا بیٹھے’ اوہناں لئی نظم تقاضے نبهانے اؤکھے رہے، مگر حیرت ہوندی اے’ ایہہ ویکھ کے کہ نور محمّد نور کپور تھلوی ورگے ودھیا نظم نگار نے جدوں اپنی طبع دی مہار غزل ولے موڑی تے کمال سندرتا نال غزل تقاضے نبھاؤن دے جتن کیتے۔تے ایہناں دی غزل وچ اوہ سارے رنگ نخرے نترے نظر آوندے نیں’ جنہاں دے بغیر غزل دا روپ سروپ رنگلا نہیں ہوندا۔۔نور محمّد نور کپور تھلوی دی غزل بارے اک خاص دھیان جوگ گل ایہہ وی اے کہ ایہناں دی غزل “_ اجوکے کئی غزل لکھاریاں ولوں جھریٹے جاون والے ” ذاتی رنڈی ۔۔۔رونیاں ” نالوں پاک تے صاف اے۔نور کپور تھلوی دی غزل اصل وچ اپنے سماج اندر تھاں تھاں پھیلی ہوئی کالک نوں مکاؤن دی نورانی خواہش تے کوشش نال عبارت اے۔ایس حوالیوں کجھ شعر ویکھن جوگ نیں~
چھاں مانن نوں نور نکھٹے آ کے پیر پسارن
اوہ کیوں دھپے سڑے وچارا جیہڑا بوٹا لاوے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کجھ لوک محبّت کرنے دا بدلا وی محبّت منگ دے نیں
اوہ پیار نوں مال تجارت دا سمجھن توں مول نہ سنگ دے نیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اوہ ذاتاں فرقیاں مذہباں دی نفرت تھیں سڑ دی دنیا تے
گھٹ بن کے پیار محبّت دی ‘ برکھا برسا کے ٹر جانواں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اوہدے ورگا مورکھ کہڑا _ رب نوں لبھن ٹر پیا جیڑا
پاویں اپنے اندر جھاتی _ دور نہ جاویں چھڈ کے نیڑا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستانی لوکاں نوں ایہ پھانسی کدے نہیں بھلنی
چار اپریل ہے سال چ آوندی بھانویں اکو واری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اینویں نہ تکلیفاں جھلو _ نال زمانے رل کے چلو
جو کجھ مل گیا اوہنوں سانبھو_ قد توں ودھ نہ ملاں ملو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایس جیون دے کئی پہلو نیں’ توں سبھ شاید ویکھے نہیں
پھولاں وچ دی لنگھن والیا’ کنڈیاں نال وی کھیہ کے ویکھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ون سونیاں گلاں اپنے مونھ چوں مانس بولے
نویاں نویاں ویکھ ایجاداں’ جدوں عقیدہ ڈولے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وچ عقیدت جکڑیا ہویا عاجز ہووے بندہ
سوچ آزاد ہووے جس ویلے بھیت ہزاراں کھولے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جویں چاولاں دے چار دانے چکھ کے ساری دیگ دا ذائقہ معلوم ہو جاندا اے’ ایسے طراں اتلے دتے ونگی دے کجھ شعراں توں ایہہ اندازہ لاؤنا اؤکھا نہیں کہ نور محمّد نور کپور تھلوی دی غزل’ اپنے سماج دے کرودھ تے کوڑھ مکاؤن دی اجیہی شعوری کاوش اے’ جیہدے وچ معمولی جیہی کڑتن ضرور اے’ پر اجیہی دوا دا آخری اثر ایہو ہوندا اے کہ مریض نوں بیماری دے روگ توں شفا مل جاندی اے ۔
” کلیات نور ” پڑھ کے نور محمّد نور کپور تھلوی دی شاعری دا مجموعی تاثر ‘ ملٹھی دے من ٹھار ذائقے تے من موہنی خوشبو ورگا اے کہ جہنوں چھتھ کے سواد بھانویں اک بندہ لے ریہا ہوندا اے پر اوہدے نیڑے بیٹھے سارے متراں دے ساہواں تے مناں نوں ملٹھی دی من موہنی خوشبو دے بلھے مہکا رہے ہوندے نیں ۔۔دینی ، سیاسی ، قومی ، سماجی تے ثقافتی قدراں دی جان کاری دا خزانہ ، مغربی ادب دے مطالعے دا شعور تے ہندی ادب نال نگھ دا سواد’ نور محمّد نور کپور تھلوی دے فکر تے فن راہیں خوب اجاگر ہو کے اوہناں دے شعری سفر دے موڑ موڑ تے ساہمنے آؤندا اے’ ایہدے اتے مزید لطف والی گل ‘ ماں بولی دے اوس سوادلے لہجے دا چسکا اے جیہدے سومے جالندھر تے لدھیانے توں جنم لے کے ساندل بار تے فیصل آباد تیکر پھیلے ہوۓ نیں ۔ایس لہجے دے ذائقے نوں اوہناں دے مطالعے دے شوق تے شعوری ورتاوے دیاں کوششاں دے’ باکمال تڑکے نے ہور سوادلا بنا دتا سی ۔ اوہناں اپنی شاعری دا نظریہ دسدیاں آکھیا سی ۔
رب نوں میں ویکھ دا واں ہر انسان وچ
تاہیوں کراں شاعری میں لوکاں دی زبان وچ
میں اوہناں دی شاعری دے ایس نظریے دی تائید کر دیاں کہنا چاہناں کہ مساوات ، رواداری تے انصاف دی امنگ رکھن دے جذبیاں دی سچائی پاروں نور محمّد نور کپور تھلوی دی شاعری لوبھاں تے حرصاں توں بے نیاز فقیر دی اوس صدا ورگی اے ‘ جیہڑا ہر ہر موڑ تے ہر ہر پیر اتے ہوکا لائی جاندا اے _کل دا بھلا تے کل دی خیر _!!
تحریر : اخلاق عاطف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔