(Last Updated On: )
مثنوی
امیر البیان میر حسان الحیدری خان چانڈیو کا نام سرائیکی وسیب میں سرائیکی شعر و اَدب اور زبان و ثقافت کے حلقوں میں متعارف و معروف ہے ۔ سرائیکی زبان و اَدب کی تاریخ کے لیے نمایاں خدمات سر اَنجام دینے والے اوّلین اَکابرین میں شمار ہوتے ہیں ۔ ملتان میں سرائیکی اکادمی کی بنیاد رکھی ۔ میر حسان الحیدری نے جہاں اُردو زبان کے نامور اَدیب ، صحافی اور شاعر ، نقاد ہیں، وہیں سرائیکی زبان میں اعلیٰ مقام اور ذوق کی حامل شخصیت ہیں ۔ ملتان اور اہلِ ملتان سے لازوال محبت و عقیدت کی ایک عمدہ مثال یہ نظم ہے ۔
یہ نظم مجلہ اختر ملتان اگست ۱۹۶۸ء کی اشاعت میں شامل تھی ۔ جسے نہایت محبت و احترام کے ساتھ سرائیکی زبان میں بمعہ حوالاجات شائع کیا جارہا ہے ۔ (مدیر )
میڈٖا دلبر میڈٖا دلدار ’’اَختر‘‘
برادر زادہ تے غمخوار ’’اَختر‘‘
تیکوں میں جان یا جاناں لِکھاں؟
جے سچ پچھیں تاں اپنْا مانْ لِکھاں
تیکوں ’’ مارو مُحب‘‘ آہدیں وی ڈٖرداں
میں اَپنْے دیس دے بردیاں دا برداں
میڈٖا سبھ کجٖھ میڈٖے دل دا سہارا
میڈٖی بٖولی دا چاتیِ بار بارا
تیڈٖے نامے جگر کوں چاک کیتا
میڈٖا دل تُوں غماں توں پاک کیتا
میڈٖی بولی مقدس بٖولڑی اے
اے الہامی زبان دی گولڑی اے
(۱)
اے ویداں دی مقدس شاخ بٖولی
ہے اے شُستہ نہیں سنگلاخ بٖولی
ایں بٖولی دے جنم بھومی دے اندر
رہیا کجھ عرصہ ھا آدم ابوالبشر
(۲)
میڈٖی بٖولی دا مرکز شہر ملتان
ہے تہذیب و ثقافت دا نگہبان
جنم پایا اتھاں تہذیب آدم
بنْیا اے عَلَّمَ الاَ سمَائَ دا سنگم
مقدس وید ایں دھرتی تے اُترے
اتھاں دے لوک دل دے صاف ستھرے
اے بٖولی پاک لوکاں دی اے بٖولی
زباں دی گٖنڈٖھ ایں بٖولی اے کھولی
بنْی قومی زبان اردو اِھیں توں
ادب دے چرچے ہِن ہر سُو اِھیں توں
ھیں بٖولی وچہ شکر گنجؒ خوب بٖولیا
ادب دے شہر دا دروازہ کھولیا
میڈٖا مرشد سونہارا غوث عالمؒ
اوہ ہند و پاک اندر دین دا تھم
بٖولیندا ہا اوہ میڈٖی مٹھڑی بٖولی
اے بٖولی ہے بہاء الحقؒ دی گولی
او صدر الدین ذات حق دا عارفؒ
ہیں بٖولی وچہ سُنْیندا ہا معارف
سائیں رکنِ جہاں نوریؒ حضوری
سلامی جنہاندے جنی ، اِنسی ، حوری
سرائیکی وچہ ہا تبلیغاں کریندا
تیہیں بٖولی دے وچہ ہا درس ڈٖیندا
سیّد گردیزی ۔ شمس سبزواری
(۳،۲)
میڈٖی بٖولی دے ہَن حافظ تے قاری
(۵،۴)
نظام الدینؒ ہیں بٖولی دا رَسیّا
(۶)
تے خسروؒ دے دیس میڈٖے وچ ہا وَسیّا
(۷)
حسن ، خسروؒ تے شھزادہ محمدؒ
(۹،۸)
پجاری ہن میڈٖی بٖولی دے بے حد
جلال الدین مخدوم جہانیاں
(۱۰)
اُچی بٖولی دیاں ڈٖے گئے نشانیاں
گرونانک ، بھگت ، مدنّ ، کبیر
(۱۱)
میڈٖی بٖولی دے ہِن سرتاج دیرا
علی حیدر سرائیکی دا ہا خیام
میاں احمد ہا ایندا اَحمد جام
(۱۲)
میاں جندن تے ڈٖتن رودکیؒ ہن
اے ہن شاعر پر اَصلوں دے ولی ہن
نظامی نظم دا عبدالحکیمےؒ
(۱۳)
ہے اُچّ کوہ طور اوہ ایندا کلیمے
لکھی لطف علیؒ واہ نظم سیفلؒ
وڈٖے شاعر کریندے پڑھ کے بھل بھل
میاں نوروزؒ ، سعدی ہا غزل دا
نہیں کوئی فریدٖنْ نال رَل دا
میں کیڑھے کیڑھے ناں تیکوں گنڑانواں
انہاں نانواں توں میں قربان جانواں
سرائیکی ، بہاولپوری ، اُچّی
پوٹھوھاری تے ہندکو صاف سُچّی
کئی رنگ روپ ہیں بٖولی ڈٖکھائے
وَنو ون دیس ہیں نے ونج وَسائے
ہیں بٖولی سندھ اتے دیرہ سُہایا
بلوچستان کوں ہیں ونجٖ وسایا
اے بٖولی غزنی تے قندھار تائیں گٖئی
(۱۵،۱۴
دکھن ۔ مدراس ۔ مارہ واڑ تائیں گٖئی
(۱۸،۱۶
اے درویشاں تے سرداراں دی بٖولی
ایں بٖولی توں میڈٖی جِند جان گھولی
میڈٖے دَور دے ملتان دی ہِک جھلک
میڈٖا ملتان ھا وَسدا اتے رَسدا
ڈٖسیندا ھا میکوں ہر چہرا ہَسدا
جمال اللہؒ دے پاڑے وچہ ہا طالوتؒ
جِہیں تے ہسوار ہاہک علم دا بھوت
ہزاراں میں جیھے پروانے ہُوندے
کئی فرزانے ہَن دیوانے ہوندے
مرید باصفا ، مخدوم دوراں
(۱۹)
جیندی پیڑھی وا ہے ملتان تے احساں
بخاری وقت دا سحبانؔ ٹرگیا
(۲۰)
بہارِؔ مرثیہ ، رمضان ٹر گیا
(۲۱)
اسدؔ ملتان دا خسروؔ وی مر گیا
(۲۲)
غلط آکھیم اوہ اپنیْ اَصلی گھر گٖیا
اَسدؔ تے ناز ہا پنجاب سندھ کوں
اَسد وی شاعری تے فخر ہند کوں
اَسدؔ اقبالؔ تے حالیؔ دا پَیرو
اوہ راہ میرؔ اتے مرزاؔ دا رَہرو
اَسدؔ ملتان دی شہرت دا تارا
اوہ ملتان دی عظمت دا سہارا
میڈٖا اُستاد میڈٖا مرشدِ فن
(۲۳)
او کیا گٖیا لہہ گٖیا حکمت دا سِجھ چَن
میڈٖے ملتان دا بلبل فریدی
گلستانِ ادب دا گل فریدی
قلم جنھاں دی میکوں مسحور کیتا
اَندھارا جَہل دا جنہاں دُور کیتا
او کیفی عشق دے جنہاں جام پیتے
(۲۴)
زمانے اُوں کوں ربّ جٖانْے کیا کیتے
نہ مستی اوندی نہ او جوش رَہ گئے
زبان جٖاننْ والا خاموش رَہ گئے
اور اَحمد شاہ پروفیسر بخاری
جنھن دِیں نغمیں دا لگٖڑا تیر کاری
میڈٖے ملتان دا او میرؔ کِن گیا
او میڈٖی خاک دا اَکسیر کِن گٖیا
او ملتانی دا بابا عبدِحق مہر
(۲۵)
حقیقت وچہ اوہ فکر و فن دا ہے شہر
میڈٖے ملتان دا او شیر ببر
او گردیزیاں دا نورِ چشم قَسور
(۲۶)
سیاست تے ادب دا مرد میدان
ادب پرور ، غریباں تے مہربان
اوں کوں وی اپنْی بٖولی دا ٹھرک اے
اوہِک ہے پر اساڈٖے کان لکھ اے
میڈٖا مخدوم سائیں سجاد عالی
(۲۷)
میڈٖی تہذیب دا وارث تے والی
پرانْی وضع دا اَصلی نمونہ
تے آپنْی بٖولی دا خادم ہے جُھونْا
ادب دی وَستی جئیں آباد کیتی
تے فن کاراں دی دل جئیں شاد کیتی
نہ پرواہ مِہنٹیاں تے سِٹھڑیاں دی
رہی سِک اوں کوں ہر دم مِٹھڑیاں دی
میڈٖے ملتان دا شِبلیٔ ثانی
او شیخ اکرام صاحب مولتانی
(۲۸)
پرانْے دَور دی پرانی نشانی
او منشی عبدِ رحمان مولتانی
(۲۹)
وڈٖا شاعر تے رندِ لا اُبالی
میاں کشفی مظفر گڑھ دا والی
(۳۰)
فنا فی العلم دے درجے تے پَنہتَل
چکھیا جئیں فلسفے تے علم دا پھل
اَکھیندن لوک فکری جنھن جواں کوں
(۳۱)
کیتا ہوں زندہ میڈٖے مولتاں کوں
نَویں نسلیں دا ہیرو مردِ اوحد
غزل دا پار کُھو شاعر ہے ارشد
(۳۲)
ہے خاک پاک ملتاں دا اینکوں درد
سرائیکی دا سودائی ہے اے مرد
نفاست دا امین اپنْا نفیسے
(۳۳)
اوہ ملتانی دا ہمدم تے اَنیسے
ڈٖاڈٖھی سوہنْی سرائیکی لکھیندے
اَتے تحقیق دا میداں مریندے
عبیداللہؒ دا پگ دار حافظ
(۳۴)
او حامد ناں جہندا ستار حافظ
(۳۵)
صحافت دیاں مہاراں جنھندے ہتھ وچہ
اڈیٹر ہَن ہزاراں جنھندے ہتھ وچہ
اوہ اپنْی ذات وچ ہا ہک دبستاں
ادب دے ’’ نَورَتن‘‘ ہر ویلے مہماں
سیاست تے ادب دا تاجور ہا
محمدنْ ھال گویا ایندا گھر ھا
میڈٖا بازو میڈٖا ہمزاد طاہر
(۳۶)
خدا رکھے تیکوں آباد طاہرؔ
ادب ، فن تے سیاست تیڈٖی بانہی
نہیں اخلاص وچہ کوئی تیڈٖا ثانی
تو ہر محفل دی جند ہر بزم دی جان
ودھایا اپنْے بٖولی دا توں مانْ
مگر اَفسوس ساکوں بھل گٖیوں توں
اَجڑ اپنْی کنوں کیوں رل گٖیوں توں؟
میڈٖا غمخوار مونس ھمدم خوب
میں رومیؔؒ او صلاح الدینؔ زرکوبؒ
ادب دی جان تے ایمان عاصیؔ
دَدھائی شہرتِ ملتان عاصی
غزل تے نظم دا اُستاد عاصی
بلا شک ہے وڈٖا نقّاد عاصی
جتھاں ہووے شالا آباد ہووے
اوندا دشمن سدا ناشاد ہووے
مظفردینؔ بابائے صحافت
بٖہوں کیتی اے اوں ملتان دی خدمت
اِڈیٹر ’’شمس‘‘ دا او خان اکرمؔ
اسدؔ دا جانشین تے میڈٖا محرم
اوہ ملتانی ثقافت دا پجاری
ہے اپنْی بٖولی اونکوں ڈٖاڈٖھی پیاری
ظفر محزون مخلص تے پیارا
(۳۷)
اوہ ملتانی صحافت دا ستارا
اساڈٖا یار اور عاشق حسینی
(۳۸)
ساڈٖیاں نظراں دے وچہ ہوں جیہاں کَینی
ساڈٖی بٖولی دا اوہ ’’ روشن چراغے‘‘
نظر اچّی ، طبیعت ڈٖاڈٖھی باغے
سائیں پرویز ناں جنھن دا ’’ریاضے‘‘
(۳۹)
مِٹھا مَن بھانونْاں تے پاکبازے
سوہنْا ’’ مسعوداَشعر‘‘ؔ نَک شہر دا
جنھندیں نظریں دے وچہ ’’امروز‘‘ فردا
میڈٖی بٖولی ہے اُوندے مَن کُوں بھانْی
میڈٖی تہذیب خود اوں دی کہانْی
ملک منظورؔ اتے ایثارؔ راعی
میڈٖی تہذیب اتے بٖولی دے داعی
اساڈٖے ’’طور‘‘ دا ہک پیا کلیمے
جنہاں دا ناں ’’اللہ ڈٖتہّ‘‘ نسیمے
(۴۰)
اوندا سینہ ثقافت دا دفینہ
میڈٖی تہذیب دا ہے اوہ نگینہ
او جُھونْا جٖوگی ساڈٖا دوست ھمراز
ادب پرور تخلص جنھدا ہا ’’ناز‘‘
(۴۱)
لکھیندا ھا اوہ ملتانی غضب دی
ہئی اوں کوں جٖانْ اساڈٖے’لوک ادب‘ دی
میکوں یاد آگیا ہک بٖیا قلندر
ہے ناں جنھں دا میاں شبیر اختر
(۴۲)
سرائیکی دا ہے دیوانہ تاں اوہے
ھِیں شمع دا ہے پروانہ تاں اوہے
ریاض انور ثقافت دا علمدار
ادب دیاں محفلاں دا ہا اوہ سنگار
سرائیکی ادب وِچ جٖان پاتُس
تے فکروفن دیں رمزیں کوں سُنجٖاتُس
میڈٖا ہک یار رضوانی بھرا ہا
(۴۳)
وڈٖا مخلص تے لاثانی بھرا ہا
ہا شیدائی سرائیکی زباں دا
اتے سودائی ہا خواجےؒ دے ناں دا
میڈٖا جانی میاں منظور ’’اَحقر‘‘
(۴۴)
زبان پرور ہے نالے دوست پرور
سرائیکی دا وڈٖا ’’ھمدرد‘‘ ہے اوہ
تے ہر میدان دے وچ مرد ہے اوہ
ریاض ، الطاف ، زکرّیا قُریشی
(۴۵)
مذاق باوفا مشہور عیشی
(۴۶)
محبِّ خاص خادم کیتھلی ھا
(۴۷)
ہے ظاہر کجھ مگر دل دا ولی ھا
ہا واہ حاجی تے واہ اوہ گلڈ ہوٹل
(۴۸)
ڈٖکھائے چار ڈٖینہہ ڈٖونہاں نے بَھل بَھل
سبھ اپنْے اپنْے سودا وچہ مگن ھَن
سبھ اپنْی ذات وچہ ہک انجمن ھَن
نویں ملتان دی تاریخ ہن اے
عطاردؔ ، مشتریؔ ، مریخ ہن اے
انہاں دی ذات شمع انجمن ہے
انہاں دے دم توں زندہ علم و فن ہے
میڈٖا ہک بیت سبھناں کوں سُنْائو
تے ساغر عشق دا بھر بھر پِلائو
بآناں کِز وفا مدہوش و مستند
سلامِ مارساں ہر جا کہ ہستند
ملتان دیاں کجھ یاداں
میڈٖا ملتان ھا مرکز اَدب دا
نظارہ ہر طرف طرح و طرب دا
ہزاریں علم دے ونجْارے اُونجا
تے کجھ میں جیہے وی ناکارے اُونجا
ہا تعمیری ادب دا حلقہ واہ واہ
(۴۹)
ڈٖکھایس علم وفن دا جھلکا واہ واہ
ہئی ’’بزمِ صوفیاء‘‘ دربار نوریؒ
(۵۰)
چلیندی ہئی اوں کوں سرکار نوریؒ
کتھاں ’’بزمِ ادب‘‘تے ’’بزمِ سیماب‘‘
۵۲،۵۱
اے گٖالھیں بنْ گٖیاں قصّے اتے خواب
نہ ’’بزمِ عیش‘‘ دی رونق ہے باقی
(۵۳)
نہ کہیں حلقے اندر ھو حق ہے باقی
’’اکیڈمی‘‘ اندر نہ جوش رَہ گٖیا
(۵۴)
ہاہک ’’آغا‘‘ سو ا وہ ’’خاموش‘ؔ‘ رہ گیا
اوہ ’’فکر و فن‘‘ دے نظّارے کن گٖئے
(۵۵)
او راتیں کن گٖیاں او تارے کن گٖئے
نہ او ’’جشنِ فرید‘‘ تے جشن ملتاں
رہیاں باقی نہ ملتانی سوغاتاں
کتھاں او باغ لانگھے خان والا
تے کتھ میلہ رہیا ملتان والا
او شہ گردیزؒ دیاں ہِن مجلساں یاد
قِلعے تے دمدمے دیاں ہِن چسّاں یاد
ساڈٖے دل کوں ہا آیا باغ او راس
جِتھاں آبٖہنھندے ہَن سبھ عام تے خاص
ہئی اے حالت حسین آگاہی اندر
پکھی جیویں پھاسدا ہے پھاہی اندر
حسین آگاہی ہے ملتان دا مال
پئے رلدے اِتھاں ہیرے تے لال
اویسی مولوی بٖوھڑ دے اندر
(۵۶)
وچیندے ہن ہمیشہ علمی جوھر
میں اپنْی بٖولی دے اتھاں لال لدھڑے
مِٹی توں چِھنڈکے موتی پاند بٖدھڑے
صدر ملتان دیاں ہِن یاد باتاں
نہیں بھلدیاں او مِصریاں تے نباتاں
دِلی در بٖاہروں منشی شہیدے
(۵۷)
تے اندروں خوش بیاں قریشی سعیدے
(۵۸)
سعادت مند بی بی پاک مائیؒ
(۵۹)
او ماپاکاں دی تے پاکاں دی جٖائی
ہے قائم پاک دروازہ اُنہاندا
تے عرشیں فرشیں آوازہ اُنہاندا
ہے درپاکاں دا اَجٖ تائیں یاد انہاندی
رہے شالا اے جھوک آباد انہاندی
حسن پروانہؒ گورستان ڈٖیکھو
(۶۰)
جے اَکھ ہووے تاں اتھ ملتان ڈٖیکھو
حضوری باغ دے ہن یاد قرشی
(۶۱)
کڈٖاھیں آندے ہَن جنہیں در تے عرشی
نہیں بُھلدیاں او ’’چانپاں‘‘ گھنٹے گھر دیاں
’’مُنگاں دی دال‘‘ تے شہزادیاں مردیاں
حسین آگاہی دا ’’قلفہ‘‘ عجب ہا
حرم در دا ’’کبابی‘‘ وی غضب ہا
میڈٖا اَصلی ٹھکاناں ’’آستانہ‘‘
(۶۲)
رَکھیسے یاد اُوں کُوں ہک زمانہ
ادب تے علم دا استھان ہا او
ڈٖوجھیں لفظیں دے وچ ملتان ہا او
اتھاں آونْ کنوں کوئی رَہ نہ سکیا
اساڈٖے بعد اوں ول کہیں نہ تکیا
میڈٖے ’’طوفان‘‘ دا او دور گِھن آ
(۶۳)
پرانْیں یادیں کوں فی الفور گِھن آ
وِہانْے وقت گذریل ویلھے کِن گئے
او منجٖھیاں کن گٖیاں او بٖیلے کن گٖئے
نہ او رانجھا نہ رانجھے دیاں تنواراں
منجٖھیاں رُل گٖیاں نہ لہندا کوئی ساراں
میڈٖا وِیرنْ میڈٖی جند جان اختر
کریندے عرض ہک حَسّان ’’اخترؔ‘‘
ڈٖیوو ملتانی کوں نَویں حیَاتی
ایں مٹھڑی بٖولڑی کوں لائو چھاتی
محض گٖالھیں نہ پبلک کوں سُنْائو
ھِیں بٖولی تے ثقافت کوں بچائو
قریشی تے گیلانی ، خاکوانی
ملک ، بوسن ، تے خواجے مولتانی
او گردیزی ہوون یا کہ صدِیقی
سرائیکی دے ہِن عاشق حقیقی
مُلّاں ، مُلوَانْے ، ذاکر ، پیر سارے
لِسّے ، بٖڈھڑے تے نینگر ویر سارے
تَوکل دا بدّھن جے رل کیتھلا
سَلائی تھی ویسی ، اے تُھلہّا مُہلا
کرو زندہ سرائیکی زباں کوں
مِٹاونْ نہ ڈٖیوو اپنْے نشاں کوں
ساڈٖی تہذیب اتے ساڈٖا کلچر
ھڑپہ ، ٹیکسلا توں وی اے برتر
موئن دڑو اتے مکران سارا
حقیقت وچ ہا اے ملتان سارا
ساڈٖی تہذیب ہے غیراں دے قابو
ساڈٖی بٖولی دی ڈٖوجھی شکل اردو
توں اپنْی بٖولی تے کلچر کوں گٖل لا
بِٖنھاں دے پچھوں لگ کے تھی نہ جھّلا
ڈٖینھوں ڈٖینہہ رکھ قدم اپنْا اَگٖونہاں
یا بالکل تھی نہ ھیں رستے دا سُونھاں
قلم میڈٖی میڈٖا تن من تساڈٖا
غریبی حال سارا دَھن تُساڈٖا
سرائیکی اکیڈمی چَلائو
تے ساریں ملکیں اے بٖولی کھنڈائو
سماعت تے میڈٖیاں گٖالھیں گِراں ہِن
جے سوچو سمجھو تاں اے حِرز جاں ہن
نہ کھا کَن چُپ تھی اے حَسّان بٖس کر
جے تھی سگٖدی عمل کرنْ دا وَس کر
حوالہ جات :
۱۔ سرائیکی زبان دے ہک محقق مرحوم سیّد علی شاہ ملتانی اپنْے ہک مقالے اندر ثابت کیتا اے جو سرائیکی زبان دی ما ں سنسکرت اے تے سنسکرت ہک الھامی زبان اے ۔ جیندے وچ مقدس دید نازل تھے اس بحث نے مفصل مقالہ لکھا ونجٖ سگھیندا اے ۔
۱۔ حضرت اسد ملتانی مرحوم سرائیکی زبان اتے ملتان دی تاریخ تے تمام نایاب مواد جمع کیتا ہا ۔ بعض انگریزی کتاباں ایجیہیاں دی ہَن ۔ جنہاں دی خاطر انگریز محقق اُنہاں کول آندے ہَن ، انہاں دی روایت اے جو آدم علیہ السلام دا نزول ملتان اُتے تھیا ہا ۔
۳،۲۔ سید بغیر شدّ دے اتے شمسّ میم دی شدّ نال عربی تلفظ دے خلاف نظم کیتم پر سرائیکی زبان دے اندر انہاں دا ایہو تلفظ اے تے میڈٖے نزدیک اے ۔
۵،۴۔ حافظ تے قاری دا لغوی معنی گھدا ونجے نہ کہ اصطلاحی معنی ۔
۹،۶۔ امیر خسرو شہزادہ شہید دی خدمت وچ امیر حسن دہلوی دے رلّے پنج سال کھن ملتان اندر رہیا ۔ اے تے سرائیکی بٖولی توں متاثر تھی کے سرائیکی اتے ہندی کوں ملا کے دوہرے ، بیت ، غزلاں تے بٖیا گھٹاں کجھ لکھیا ہِس ۔ حضرت نظام الدین اولیا ۔ امیر خسرو توں ہندی علیل سرائیکی زبان دے ۔ بیت سونْ کے ڈٖاڈٖھے خوش تھیندے ہَن ۔
۱۰۔حضرت شاہ رکنِ عالم دے خلیفے مخدوم جہانیاں ؒ دے ملفوظات وچ سرائیکی زبان دے محاورے کافی مِلدن۔
۱۱۔ اے ترئے شاعر قدیم ہندی مِلیل سرائیکی زبان دے شاعر ہَن ۔ انہاں دے کلام وچ سرائیکی دا کافی اَثر تے ذخیرہ الفاظ نظر آندے ۔
۱۲۔ پرہاراں شریف تحصیل لیاقت پور دے مشہور فریدی سلسلے دے بزرگ میاں احمد دین اتے پائی آہنہ تحصیل خان پور دے مولوی نور احمدصاحب فرید ی سرائیکی دے بلند پایہ شاعر تھی گزرین ۔ ( م ۔ ح )
۱۳۔ اُچ شریف دے مولوی عبد الحکیم صاحب جنھیں یوسف زلیخا دا قصّہ سرائیکی نظم وچ جوڑیا ہا ۔ وڈٖا اُچا شاعر اے ۔
۱۸،۱۴۔ افغانستان دے قدیم لوک سرائیکی زبان بُٖلیندن ہیں وجہ توں ہیں بٖولی کوں ہندکو وی آکھیا ویندے ۔ دکھنی اردو تے سرائیکی دے اثرات اینجھے نمایاں ہَن جو ہیں موضوع تے کتاب لکھیج سگھیندی اے ۔ مدراسی اردو دے اندر وی سرائیکی دے اثرات ہن ۔ راجستھان دا علاقہ جنھن کوں ماڑ واڑ آکھیا ویندے سرائیکی اثرات توں خالی نہیں ۔ اے بلکہ پوربی زبان اندر وی سرائیکی اثرات ہن ۔ خواجہ فرید صاحب فرمیندن ۔
شعر فرید تیڈٖا ونجٖ ہلیا
ہند ۔ ماڑ ۔ دکھن ۔ پورب ۔ تاں وی کیا تھی پیا؟
معلوم تھیندے انہاں علاقیاں اندر خواجہ فرید دے کلام دی شہرت ہائی ۔
۱۹۔ حضرت غوث بہائو الحق دے مرحوم سجادہ نشین مرید حسین قریشی ۔
۲۰۔ سید عطا ء اللہ شاہ بخاری ۔
۲۱۔ مشہور مرثیہ گو ملتانی شاعر مولوی محمد رمضان صاحب بہار ملتانی
۲۲۔ اسد ملتانی ۔
۲۳۔ قابل فخر ادیب مؤ رّ خ تے سیرت نگار مولانا نور احمد خان فریدی
۲۴۔ کیفی جام پوری
۲۵۔ ڈاکٹرمہر عبد الحق سرائیکی زبان دا عظیم محقق
۲۶۔ سیّد محمد قسور گردیزی
۲۷۔ مخدوم محمد سجاد حسین ۔ ایم این اے ۔ سجادہ نشین بارگاہ غوث بہائو الحق زکریا ملتانی
۲۸۔ شیخ محمد اکرام ایڈووکیٹ
۲۹۔ منشی عبد الرحمن خان
۳۰۔ کشفی الاسدی ، مدیر: بشارت مظفر گڑھ
۳۱۔ عقیق فکری
۳۲۔ ارشد ملتانی
۳۳۔ سرائیکی دا قابلِ فخر فرزند جناب نفیس چغتائی وکیل ملتا ن
۳۴۔ سرائیکی زبان دے ہک قدیمی شاعر اتے بزرگ عالمِ دین حضرت مولوی عبید اللہ ملتانی
۳۵۔ ملتان وچہ اخبار فروشی دے بانی مبانی مشہور صحافی تے سیاسی ورکر کو ڈاکٹر حافظ عبد الستار مولوی عبید اللہ مرحوم دے خاندان دے بٖلدے ڈٖیوے ۔
۳۶۔ ملتان دیں ادبی حلقیں دی جان اتے سرائیکی د ا جھونْا جوگٖی محمد طاہر خان اساڈٖا چھتڑیاں لادا یار تے ساتھی۔ کہیں دے ہتھ وچ مہار ہو وس تاں ڈٖا ڈٖھا جوان اے ۔
۳۷۔ اخبار ’’ کارزار‘‘ ملتا ن دا ایڈیٹر تے علیگ برادری دا پرانْا ساتھی ۔
۳۸۔ ملتان دے پرانے پرچے ’’ روشن چراغ‘‘ دا ایڈیٹر تے ملتانی دا شاعر عاشق حسین حسینی ۔
۳۹۔ نوائے وقت ملتان دا اسٹاف رپورٹر ریاض پرویز ۔
۴۰۔ ایمرسن کالج ملتان دا ریٹائرڈ ہیڈ کلرک اتے ملتانی زبان دا قادر الکلام شاعر ملک اللہ دتہ نسیم ۔
۴۱۔ علامہ طالوت مرحوم دا جگری دوست خواجہ فرید دے دیوان والے اردو ترجمے د اہک رکن اتے ، اساڈٖا یار صوفی عبد المجید ناز فریدی ۔
۴۲۔ حضرت کیفی جام پوری دا لائق فرزند ’’ امروز‘‘ ملتان دے ایڈیٹوریل اسٹاف دا رکن اتے ملتانی ادب دا اوہ ماہر شبیر حسین اختر ۔
۴۳۔ ’’جنگ‘‘ کراچی دا ملتان اندر نمائندہ خان رضوانی جیڑھا سرائیکی اکادمی ملتان دا اجٖ کل جنرل سیکرٹری وی ہے۔
۴۴۔ ہمدرد پریس ملتان دا مالک اتے ملتانی زبان و اَدب دا شیدائی حاجی مولا نا منظور احمد ’’ احقر ‘‘ ۔
۴۵۔ ریاض حسین ۔ الطاف حسین اتے محمد زکریا قریشی حضرت غوث بہائو الحق دے خاندان دے نامور فرزند اتے بامذاق ، باعلم نوجوان ہن ۔ پہلا نمبر وکیل ڈٖوجھا نمبر ڈاکٹر اتے تریجھا نمبر تحصیلدار اے ۔
۴۶۔ اردو زبان دے مشہور شاعر حضرت عیش فیروز پوری دا لائق شاگرد بہترین شاعر جناب مذاق العیشی اساڈٖا ہمدرد تے مہربان دوست ہا ۔
۴۷۔ مثالی درسگاہ ملتان دے ہیڈ ماسٹر اتے اردو زبان دے شاعرجناب خادم کیتھلی ۔
۴۸۔ حاجی حمید الدین صاحب کہیں گلڈ ہوٹل ادیباں واسطے وقف کیتا ہا ۔
۴۹۔ ملتا ن دیاں تعمیر پسند مسلمان ادیباں تے شاعراں دی انجمن ’’ حلقہ ٔ تعمیری ادب ‘‘ جنھدا صدر اے خاکسار تے نائب صدر عاصی کرنالی صاحب ہَن ۔ تحقیقی تے تنقیدی مقالات دی بنیاد ملتان اندر ہیں حلقے رکھی ہئی ۔
۵۰۔ ملتان دیاں صوفی طبع لوکاں دا ادارہ جنھاندے تحت حضرت شاہ رکن عالم نوری دی جامع مسجد اندر ایہہ خاکسار ہر جمعرات دی شام کوں تفسیر قرآن دا درس ڈٖیند ا ہا ۔
۵۱۔ غالباً حضرت ضیا صدیقی دا ادارہ جنھن ملتان اندر مشاعریاں دی رسم جاری کیتی اتے نوجوان شاعراں دی جٖانْ سنجٖانْ کرایس ، کنھجن زمانے ہیں ادارے ملتان اندر ادب تے شاعری دی روح پھوک چھوڑی ہئی ۔
۵۲۔ حضرت ادب سیمابی ، عزیزحاصل پوری ، ہلال جعفری ، اتے منظور جاوید ہوراں دا ادبی ادارہ جنھن نوجوان نسل کو ں شعر گوئی دا دھیان ڈٖیوایا ۔
۵۳۔ حضرت عیش فیروزپوری دیاں شاگرداں دا ادبی حلقہ جنھندا روح رواں مذاقؔ العیشی ہوندا ہا ۔ ہیں حلقے وی ملتان اندر ادب تے شاعری دی وڈٖی خدمت کیتی اے۔
۵۴۔ ملتان اکادمی جنھندا ڈٖوجھاناں حضرت آغا خاموش ہا ۔ تمام وڈٖیاں لوکاں دا ادارہ ہا ۔ شایدھیہیں خاطر مرگٖیا ۔ جے آغا صاحب ہیں کوں عوامی سطح تے چلاون ہا تے ہِیں ادارے توں ساکوں وڈٖیاں امیدان ہَن ۔
۵۵۔ ملتان دیاں ترقی پسند اتے نویں نسل دیاں شاعراں اتے ادیباں دا ادارہ جنھن دے اندر ریاض انور شبّیر حسین اختر ۔ خاور جسکانی ۔ پروفیسر عرش صدیقی اتے پروفیسر عبد الغفار درّانی ڈٖاڈٖھا کم کریندے ہَن ۔ پر افسوس جو ایہہ وی جلدی ختم تھی گٖیا ۔
۵۶۔ ملتانی زبان دیاں کتاباں چھاپنْ والے اندرون بٖوہڑ گیٹ دے مولوی حقیقت دے وچ سرائیکی تہذیب اتے ادب دے محسن اتے ملتان دے نولکشور ہن ۔
۵۷۔ حضرت حافظ جمال اللہؒ دے خلیفے اتے فارسی ملتانی دے قادر الکلام شاعر منشی غلام حسن شہید ۔ فارسی وچ حسنؔ تے ملتانی وچ گامنْ تخلص ھا ۔
۵۸۔ شہزادہ مراد دا دربٖاری شاعر فارسی زبان دا بدیہہ گو اصل رہا کو ملتان دا حضرت سعید خان قریشی جنھن دا مزار دلی دروازے دے مشہور ہے ۔ حضرت شاہ رکن عالم نوری دی والدہ ماجدہ بی بی راستی پاکدامنجہیں دے ناں توں پاک دروازہ مشہور ہے ۔
۵۹۔ گورستانیں دے شہر ملتان دا ہک قدیم گورستان اے ۔ حضرت اسد ملتانی مرحوم دا خیال ہا جو حسن پروانہ سائیں دی شاعر ہَن ۔ حسن ناں تے ’’ پروانہ ‘‘ تخلص معلوم تھیندے ۔ کھوجٖنا کیتی ونجے تاں حضرت حسن پروانے دے حالات اتے کتاب ضرور لبھ پوسی ۔ہِیں گورستان اندر وی ملتان دے ہزاراں لالمِٹی وچ چُھپے پئے ہن ۔
۶۰۔ حضوری باغ پیر خورشید کالونی دا نامور بزرگ مخدوم احمد کبیر علم اتے ادب دا شوقین اتے قدردان ہا اوندے فرزند مخدوم خورشید احمد قریشی کوں وی علم دی لذّت حاصل اے ۔ میڈٖا جگری یار پیر آفتاب احمد قریشی ملتانی زبان تے ادب دا رَسیا تے دوست پرور انسان اے۔
۶۱۔ ملتان دا مشہور علمی ادبی روحانی ماہانہ رسالہ ’’ آستانہ زکرّیا ‘‘جہیں دا ایڈیٹر دے خاکسار ہا ۔ تے جیڑھا ہُنْ مرحوم تھی گٖئے ۔
۶۲۔ لاہور دے ہفتہ وار ’’چٹان ‘‘ دی بد زبانی دا جواب ڈٖیونْ خاطر خاکسار ۱۹۶۳ء وچ ’’ طوفان ‘‘ دا ایڈیٹر بنْیا ہا ۔ او ہ دور واقعی میڈٖی طوفانی صحافت دا دَور ہا ۔
٭
( بشکریہ مجلہ اختر ملتان ، اشاعت : اگست ۱۹۶۸ء ، جلد : ۵ ، شمارہ : ۳۲، نگران : مولانا نور احمد فریدی )
٭٭٭
میر حسان الحیدری (صادق آباد)
میر حسان الحیدری (صادق آباد)