(Last Updated On: )
ظہوراحمد دھریجہ
سرائیکی خطے دی تاریخ اتنی ای قدیم ہے جتنی جو انسان دی اپنْی تاریخ ، اے منی منائی حقیقت ہے جو کائنات دی ہر تہذیب دا تعلق ہمیشہ دریاویں دے نال ہوندے ۔ اساڈٖا پیارا شہر خانپور دریائے سندھ توں پچھاد پاسے 22 کلومیٹر دے فاصلے تے واقع ہے ۔ تحصیل خانپور دے علاقے کوں ست دریاویں دا سنگم ہوونْ دا شرف تے اعزاز وی حاصل اے ۔ اتھاں پاکستان دے سارے دریا کٹھے دریائے سندھ اچ رَلدن تے کشمور تے گڈو دے دگٖ توں سمندر دا رُخ کریندن ۔ تاریخی طور تے ایں علاقے دی سرسبزی تے شادابی صدیاں توں مشہور امدی پئی اے ، ایں سانگے مختلف حملہ آوریں ، لُٹ مار دی نیت نال اِتھاں حملے کریندے رہ گٖئے ۔ تاریخ گوہا ہے جو 2300 قبل مسیح ، سکندر اعظم اوچ توں تھیندا ہویا دریا دے کنارے خانپور دے قصبہ چاچڑاں شریف توں لنگھیا۔ 712ء اچ مسلمان سپہ سالار محمد بن قاسم دیاں فوجاں سرائیکی وسیب دیاں ڈٖو سلطنتاں اوچ تے ملتان تے قبضے کیتے ٹھٹھہ توں تھیندے ہوئے خانپور دے نواحی قصبے ججہ اچ پڑاؤ کیتا ۔ روایت دے موجب عرب فوج دے سپاہی کھاونْ اچ پنڈو زیادہ ورتیندے ہن ۔ ایں سانگے ججہ اچ قیام دے ویلھے کھجیں دی گٖکڑیں توں گھجیں دے ونْ زیادہ پیدا تھئے ۔ ججہ اچ احٖ وی کھجیں دے وڈٖے وڈٖے باغ ، عرب لوکیں دی نشانی دے طور تے موجود ہن ۔ 1025ء اچ حملہ آوریں محمود غزنوی دی سومنات دے مندر بھننْ دے ناں تے ایں علاقے اچ لُٹ مار کیتی تے قلعہ مئو مبارک سمیت خانپور دے بٖہوں علاقے کوںاپنْی راجدھانی اچ شامل کیتا ۔
خانپور شہر دی بنیاد بہاولپور خان ثانی قلعہ گڑھی اختیار خان کوں فتح کرنْ دے بعد 1806ء اچ رکھی ، انہاں اِتھاں عالیشان مسیت بنْوائی ۔ خانپور دے ہک پرانْے قلعے دی تعمیر و مرت کرائی ۔ خانپور کوں نظامت دے صدر مقام دا درجہ ڈٖتا۔ ڈسٹرکٹ جیل ، عدالتاں تے ڈٖوجھیاں سرکاری عمارتاں وی بنْوائیاں ۔ ڈٖیکھدے ای ڈٖیکھدے خانپور عالیشان شہر بنْ گٖیا ، بازار تے تجارتی مرکز قائم تھئے ، جنس مثلاً پھُٹی ، اناج ، سبزی تے پھل فروٹ دی بٖہوں وڈٖی منڈی وی بنْ گٖئی ۔ ایںطرح بہاولپور دے بعد خانپور کوں ریاست دے سب توں وڈٖے تے مرکزی شہر دی حیثیت حاصل تھی گٖئی ۔ 1871ء اچ خانپور اچ تباہ کن سیلاب آیا جیندی وجہ توں خانپور غرق تھی گٖیا تے سب کجھ نیست و نابود تھی گٖیا ، پر خانپور دے باہمت لوکاں کجھ سال دے عرصے اچ خانپور کوں ہک دفعہ ولا تعمیر کر ڈٖتا۔ 1874ء اچ خانپور کوں میونسپلٹی دا درجہ ملیا تے اتھاں جدید طرز دی سولائزیشن زندگی دا آغاز تھیا ۔ میونسپل کمیٹی ہک خودمختار ادارہ ہئی ، اوندی آمدنی خرچیں توں وافر ہئی ، اے کمیٹی شہریاں کوں اعلیٰ سہولتاں ڈٖیونْ دے نال نلا بچت اتنی کر گھندی ہئی جو درالحکومت بہاولپور دی میونسپلٹی خانپور دی بلدیہ توں قرض گھندی ہئی ۔ خانپور شہر دیاں سڑکاں تے گٖلیاں کوں پکا کیتا گٖیا ۔ خانپور دی صدر بزار کیتے ایجھیاں سلکھیں منگوائیاں گٖیاں جیڑھیاں چمکیلیاں تے لیسویاں ہن ، اوجھیں سلھیں دا نمونہ تے تصور صرف دلی یا ملتا ن اچ موجود ہا ۔
1880ء اچ ریلوے لائن وچھائی گٖئی تاں اہمیت دے پیش نظر انگریزاں خانپور کوں بٖہوں وڈٖے ریلوے اسٹیشن دا درجہ ڈٖتا تے خانپور اچ ریلوے اسٹیشن ، ریلوے کلب، ریلوے ہسپتال ، ریلوے سٹیڈیم تے ریلوے کالونی اچ پکیاں سڑکاں تے فوارے قائم کیتے ، جینکوں ڈٖیکھنْ کیتے پرے پرے توں لوک امدے ہن ، ایں لحاظ نال خانپور تجارتی تے ثقافتی مرکز ہوونْ دے نال نال بہترین تفریحی پوائنٹ دی حیثیت اختیار کر گٖیا ۔ چاچڑاں ریلوے لائن دے ذریعے خانپور کوں جنکشن دی حیثیت حاصل تھی ، اے ریلوے لائن اپنْے مرشد خواجہ فرید دے مسکن ( چاچڑاں شریف) تک آونْ ونجٖنْ کیتے نواب آف بہاولپور اپنْے خرچے تے تعمیر کرائی ، ریلوے دی انتظامیہ چہندی تاں چاچڑاں کوٹ مٹھنْ دے وچکار پل بنْا تے اونکوں کوئٹہ تے پنڈی نال ملا سگٖدی ہئی پر ریلوے ہیڈ کوارٹر لاہور دی بدکردار بیورو کریسی نے ایں لائن کوں وسعت ڈٖیونْ دی بجائے چاچڑاں ریلوے لائن اکھاڑ تے ایندا لوہا نواز شریف دی اتفاق فاؤنڈری اچ سٹ ڈٖتا، ہُنْ وی ایں منصوبے کوں نویں سرے توں تشکیل ڈٖیونْ دی لوڑھ ہے ۔
19 ویں صدیاچ ملتان تے سکھر وچالے سب توں وڈٖا تجارتی مرکز خانپور ہا ، خانپور دا ہوائی اڈٖا اوںویلھے قائم تھیا جڈٖاں لہور تے کراچی دے سوا کوئی اڈٖا نہ ہا ، خانپور ائیرپورٹ احٖ وی موجود اے پر او پی آئی اے دے جہازیں دا نی بلکہ ’’ ڈٖوجھے جہازیں ‘‘ دا اڈٖا بنْیا ہویا ہے ۔ خانپور دے ہندو تے مسلمان تاجر دلی دے نال براہ راست تجارت کریندے ہن ۔ خانپور دی واحد گھریلو صنعت ظروف سازی ہئی تے خانپور دے کٹورے جنہاں دا رنگ سونے دی طرح چمکدرا ہوندا ہا نہ صرف ہندوستان بلکہ انگلینڈ تک مشہور ہن تے محلہ ٹھٹھاراں کانپور دے کاریگریں دا کمال اے ہا انہاں این فن اچ عظمت دا لوہا منوایا تے کٹورے دی صنعت کوں اتنی ترقی ڈٖتی جو خانپور دا ناں خانپور کٹورہ پئے گٖیا ۔ بقول میاں انیس دین پوری انگریزی دے خلاف تحریک آزادی دے سب توں وڈٖے مرکز خانپور اچ گاندھی جی تے مولانا عبدالکلام آزاد تشریف گھن آئے تاں اہالیان خانپور دی طرفوں ’’ کٹورے ‘‘ دی سوکھڑی انہاں دی خدمت اچ پیش کیتی گٖئی ، اوںکٹورے کوں دلی اچچ ہک ہزار اچ لیلام کر تے اہلیان خانپور دی طرفوں ’’ تحریک ترک موالات ‘‘ اچ جمع کرایا گٖیا جیندے نال ایں تحریک کوں ودھارا تے حوصلہ ملیا تے بر صغیر اچ خانپور دا ناں بٖہوں چرچا تھیا ، خانپور دی ہک بٖئی سوغات خانپوری کھویا وی مشہور ہے پر ہُنْ صرف ایندا ناں باقی ہے ، اگر اتھوں دے حلوائی توجہ کرن تاں اے صنعت منافع بخش ثابت تھی سگٖدی ہے ۔
تعلیمی لحاظ نال خانپور دا ریکارڈ بٖہوں چنگٖا رہ گٖئے ، دین پور شریف جتھاں بٖہوں وڈٖے مدرسے تے یونیورسٹی دے طور تے طالب علمیں کوں علم دا سوجھلا ڈٖیندا ہا ،اُتھاں خانپور دا ہائی سکول جیڑھا 1927ء اچ قائم تھای ، تعلیمی خدمات سر انجام ڈٖیندا پیا ہے ۔ خانپور ضلعے دے چھوٹے چھوٹے قصبیں احمد پور لمہ ، صادق آباد، آباد پور ،نوشارا ( موجودہ رحیم یارخان ) ، اللہ آباد، پکا لاراں وغیرہ دے لوک اتھاں علم حاصل کرنْ امدے ہن ۔ خانپور دی سرزمین زرخیز ہوونْ دے نال نلا ہمیشہ مردم خیز وی رہی ہے ۔ ایں دھرتی خواجہ فرید ؒ ، خلیفہ غلام محمد بانی دین پور ؒ ، حضرت جیٹھ بھٹہ ؒ ، شیخ عبدالستار ؒ ، بابا گجنْؒ ، بابا جندن شاہ ؒ ، مولانا عبیدا للہ سندھی ؒ ، مولانا سراج احمد مکھن بیلوی ؒ ، حضرت سراج اہلسنت ؒ ، مولانا عبدالغنی جاجروی ؒ (ڈھنڈ گاگڑی دی نسبت توں مقامی زبان اچ لفظ گاگڑوی ، عربی ترکیب نال آپ نے اپنْا لقب جاجروی لکھیا ، رحیم یارخان اچ آپ دا بٖہوں وڈٖا مدرسہ احٖ وی موجود اے ) ۔ مقرر بے بدل ، مولانا عبدالشکور دین پوری ، مولانا خورشید احمد فیضی ، مولانا محمد عبداللہ درخواستی ( جنہاں کوں عرب دے علماء تے صلحاء دی طرفوں شیخ العرب و العجم دا خطاب ملیا ) سید الطاف حسین ( بانی آئی ہسپتال ) ، تحریک بحالی صوبہ دے ہیرو ریاض ہاشمی مرحوم تے ایں طرح دے بے شمار عالم ، فاضل ،ادیب ، شاعر ،دانشور ، دستکار و سپہ سالار ایں دھرتی نے پیدا کتین ۔ خانپور دا سب توں وڈٖا حوالے حریت ، آزدی تے ظلم دے خلاف جدوجہد اے دین پور تحریک آزدی دوران مولانا عبیداللہسندھی دی زیر قیادت انگریزاں دے خلاف تحریک آزادی بٖہور وڈٖا مرکز رہ گٖئے ۔ مسلم لیگ 1906ء اچ قائم تھئی ، جڈٖنْ جو سرائیکی دھرتی دے عظیم شاعر حضرت خواجہ فرید ( متوفی 1901ء ) ایں توں کئی سال پہلے ’’ اپنْی نگری آپ وسا توں پٹ انگریزی تھانْے ‘‘ دا نعرہ لا تے انگریزاں دے خلاف عملی جدوجہد اچ حصہ گھدا۔ اوں ویلھے مصور پاکستان ’’سر ‘‘ علامہ اقبال آزادی دا نہ کوئی خاب ڈٖٹھا ہا تے نہ اناہں دے گمان اچ پاکستان دا کوئی نقشہ ہا ، پر ایں ظلم کوں کیا آکھوں جو پاکستان دی تریخ تے نصاب دیاں کتاباں اچ ’’ سر ‘‘ علامہ اقبال دے تعریفاں نال بھریاں پن ، جڈٖنْ جو خواجہ فرید تے مولانا عبیدا للہ سندھی ؒ دا ذکر نصاب دے کتاب اچ گٖولنْ نال نی ملدا ۔
تحریک آزدی دے وڈٖے مرکز خانپور کوں ’’ سزا ‘‘ ڈٖیونْ کیتے انگریزاں دے حاشیہ برداراں خانپور دی ترقی روک تے تنزلی دا عمل شروع کیتا، ریاستی کابینہ دے اہم ارکان غلام میراں شاہ تے مخدوم مزادہ حسن محمود وغیرہ نے ایں سلسلے اچ اپنْے جوہر ڈٖکھائے ، خانپور دی ضلعی حیثیت ختم کر تے رحیم یارخان کوں ضلعی حیثیت ڈٖے ڈٖتی گٖئی ، خانپور دے کئی تجویز شدہ لیور برادر رحیم یارخان اچ قائم کر ڈٖتی گٖئی تے ریاست دی کابینہ اچ خانپور دی نمائندگی دی مخالفت کیتی گٖئی ۔ انگریزاں خانپور دی مخالفت اچ جو ( رتی لکیر ) چھِکی اوں تے عملدرآمد صرف پچھلے دور بلکہ احٖ وی جاری ہے۔
1871ء دے تباہ کن سیلاب دے ٹھیک ہک صدی ڈٖو سال بعد 1973ء اچ ہک دفعہ ول تباہ کن سیلاب آیا ، ایں واری نہ صرف خانپور شہر بلکہ تحصیل خانپور دا 70 فیصد دیہاتی علاقہ وی غرق تھی گٖیا ،خانپور دی غرقابی دے بعد پوری دنیا توں میڈیا دیاں تیماں مختلف حکومتاں دے عمائدین ، مخیر حضراتتے ڈونر ایجنسیں دے نمائندے خانپور آئے ، انہاں تصویراں ، فلماں بنْائیاں تے ارباں روپے دی امداد خانپور دے ناں بھیجی پر خانپور کوں اوندا ہک فیصد وی نہ ملیا ۔ خانپور کوں محروم رکھنْ اچ جتھاں لہور دی بیورو کریسی دی کھوٹ شامل ہئی ، اُتاھں خانپور دے نمائندے چوہدری کلیم اللہ دے غلطیں دا ذکر نہ کرنْ وی تاریخ نال کھوٹ تے وانجھ ہوسے ۔ بحالی دے کم اچ امداد توں محروم ی دی ہک وجہ چند عاقبت نا اندیش انہاں سایسی ورکراں دی وی ہئی جنہاں خانپور دے سیالب توں متاثرہ علاقیں دے دورے دے دوران وزیراعظم ذوالفقار علی بھٹو نال بد تمیزی کیتی ، سیلاب دے موقعے تے دورے ویلھے ذوالفقار علی بھٹو نال بد تمیزی کیتی ۔
1985ء دے غیر جماعت الیکشن اچ جنرل ضیا الحق دی خانپور قومی اسمبلی دا حلقہ کھس تے اونکوں لسانی بنیاد تے ونڈ ڈٖتا گٖیا ، خانپور اچ ایندے خلاف سخت اشتعال پیدا تھیا پر حکومت ہک نہ سنْی ، 1985ء دے الیکشن اچ خانپور دے لوکاں توں سب توں پہلے حاجی سیف اللہ دوکھا کیتا تے خانپور اچ چرب زبانی ، کوڑ تے فرید دی سیاست دی بنیاد رکھی ، ایندے بعد لسانی عصبیت رنگ ڈٖکھایا ، حاجی سیف اللہ دے بعد میاں عبدالخالق تے اوندے بعد ڈٖو دفعہ چوہدری جعفر گجر آئے ، حاجی سیف اللہ دی طرح انہاں ڈٖوہیں دا تعلق وی کانوپر توں ہا ، ایں سانگے انہاں ڈٖوہاں نے خانپور دی تنزلی اچ اپنْا پورا پورا کردار ادا کیتا ۔ جنرل مشرف دے نویں نظام دے تحت نویں سرے توں حلقہ بندیاں وجود اچ آیاں ، خانپور کوں قومی اسمبلی دا حلقہ واپس ملیا ، اکتوبر 2001ء الیکشن اچ قومی سیٹ تے ڈٖو ’’ نیم خانپوریں ‘‘ ( ہک دی اصل رہائش رحیم یارخان تے ڈٖوجھے دی لہور ) پی پی دے میجر تنویر تے ق لیگ دے سیٹھ انور دے وچکار مقابلہ تھیا ۔ پی پی دے جیالے نظریاتی بنیادیں تے ووٹ دے مسئلے تے اپنْے قریبی رشتے داریں حتیٰ کہ اپنْے بزرگیں دے وی گٖل پے گٖئے ، ڈٖوجھے امیدوار سیٹھ انور جئیں بھرے جلسے اچ اعلان کیتا ہا جو میں جتاں یا ہراں 24 اچوں 18 گھنٹے روزانہ خانپور اچ نہ گزراں تاں میکوں پھاسی ڈٖے ڈٖیویجو ،غائب ہِن ، ووٹر بے چارے ڈٖیوے چا چاتے انہاں کوں لبھیندے ودن پر انہاں دا کوئی اتہ پتہ کائنی ۔ جڈٖنْ الیکشن دا زمانہ ہا تاں 10 سال پہلے دیاں فوتگیاں دے مکانْ ڈٖویندے پئے ہن ، اھٖ انہاں دی جماعت دے نیڑے دے ساتھی فوت تھئے تاں او تعزیت کیتے نہ آئے ۔ اپنْے والد سیٹھ اسلم ( جیڑھے لگاتار پنج واری کامیاب تھین ) دے سیاسی کیریئر کوں داغدار کرنْ کیتے یسٹھ انور چھوٹا موٹا کاروبار کرنْ آلے غریب محنت کشاں مثلاً ٹیکسی ڈرائیوراں ، پینٹرز تے پرنٹنگ پریس اونرز دے لکھاں دبا رکھن ‘ اناہں دے گھریں دے چولہے وسمیے پِن پر سیٹھ انور اناہں ویچاریں کوں فٹ بال بنْا تے لہور تے رحیم یارخان دے چکریں تے رکھیا ہویا ہے ۔ سیٹھ انور تے میجر تنویر ڈٖوہیں حضرات بر سر اقتدار جماعت دے نال وابستہ ہن ، پر خانپور دا ہک وی مسئلہ حل نی تھیا ، اے ظلم نی تاں بٖیا کیا ہے ؟
سیاسی ، ثقافتی تے تاریخی حوالے دے نال نال خانپور دے مسائل دا ذکر آوے تاں اساکوں معلوم تھیندے جو خانپور دا اہم مسئلہ چاچڑاں تے کوٹ مٹھنْ دے درمیان دریائے سندھ تے نشتر گھاٹ پُل دی تعمیر ہے ۔ مرحوم عبدالرب نشتر توں گھن تے نواز شریف تئیں سارے سیاستداناں تے حکمراناں پلدے وعدے کیتے پر وعدہ نبھاونْ دی نوبت احٖ تئیں نی آئی ، نشتر گھاٹ بنْ ونجٖے تاں لکھاں انساناں دا بھلا تھیسے تے ڈھائی سو میل دی اضافی مسافت گھٹ تھی ویسے ۔ خانپور ضلع دی بحالی وی اتھوں دا دیرینہ تے حساس مسئلہ ہے ، حکومت خانپور دے مقابلے اچ چار گنا چھوٹے تے گھٹ ریونیو ڈٖیونْ آلے شہراں کوں ضلعے درجہ ڈٖتے تاں خانپور ضلع دی بحالی اچ دیر کیوں ، خانپور اچ خام مال دی پیداوار اتنی زیادہ ہے جو حکومت دے کول اجناس سٹور کرنْ کیتے گنجائش کینھی پر اتھاں انڈسٹری نی جیندی وجہ توں بے روزگاری زیادہ ہے ، نینگر خودکشیاں کریندے پن ۔ حیدر آباد دے سیٹھ خانپور دی واحد ٹیکسٹائل مل بی ٹی ایم فیصل آباد دے چور صنعتکار کوں ویچ تے چلے گٖئے ،انہاں سینکڑاں مزدوراں دا کروڑاں روپیہ ہڑپ کیتا تے کروڑاں روپے مزید حکومت توں قرض گھن تے بھجٖ گٖئے ، ہُنْ بی ٹی ایم دے کئی مزدور فاقیں توں فوت تھی گٖن تے کئی خودکشیاں کر چکین ، تے بٖہوں زیادہ مزدور حق ملنْ دی امید اچ قبر اچ ونجٖنْ کیتے تیار بیٹھن ۔ ایں طرح 1964ء اچ قائم تھیونْ آلی حئی سنز شوگر مل دی فیصل آباد دی مالکان نے خریدی ، اناہں لوکاں خانپور کوں سب توں پہلی سوکھڑی اے ڈٖتی جو تمام مقامی مزدوراں کوں مل وچوں کڈھ ڈٖتا تے پنجاب توں بندوق نال مسلح ہٹے کٹے ، بدمعاش تعینات کر ڈٖتے ،معاشی قتل جیڑھا جو جسمانی قتل توں زیادہ جرم ہے ، دا کھلم کھلا ارتکاب تھیا ، پر کہیں حکومت ، کہیں عدالت یا ول کہیں منتخب نمائنداین وچوں کہیں دی ضمیر دی عدالت نے ہزاراںانساناں دے معاشی قتل دی ایف آئی آر صرف پڑھنْ تک دی زحمت گوارا نی کیتی ، ہپنْ مالکان نے چند سال دے عرصے اچ ہک توں ترائے شوگر ملاں بنْا گھدن ۔ مل دیاں بنیاداں اچ اپنْا خون پسینہ شامل کرنْ آلے انسان تے انہاں دیاں اولاداں در ددر دیاں ٹھوکراں کھمدیاں پئین تے اپنْے ارباب اختیار تے نمائندیاں دے سامنْے سوالیہ نشان بنْیئے ہوئے ہن ، کیا کوئی اساکوں اساڈٖا حق ڈٖیویسے ؟ یا ول حمزہ شوگر ملز دے مالکان ( جنہاں ست ست حج کیتے ہوئے ہن ) دے دل اچ کالی کملی ؐ والی سرکار دے صدقے خانپور دے مقامی مزدوراں تے رحم آؤسے ؟
خانپور دے سرمایہ داراں تے صنعتکاراں اتھاں دی شوگر ملن ہ خرید کیتی تے نویں انڈسٹری قائم نہ کر تے مجرمانہ غفلت دا مظاہرہ کیتا۔ تقسیم توں پہلے خانپور دے ہندو سیٹھ دلی توں ’’ ٹریول چیک ‘‘ ( اوں ویلھے دی مقامی اصطلاح اچ ’’ ٹیبھوں‘ ‘) دے ذریعے ہزاراں منگویندے تے ہسپتال ، سکول تے مسلم و ہندو بیوگان تے تعلیمی حاصل کرنْ آلے یتیم بٖالیں اچ ونڈیندے ہن ، احٖ خانپور اچ سیٹھ اسلم ، شیخ فیاض ، سیٹھ جاوید، حاجی مختار احمد بھولا تے ایں طرح دے درجناں ارب پتی موجود ہن پر فلاحی کماں دے حوالے توں انہاں دا کوئی کردار نی ۔ شہر دے کہٰں انسانیں کوں انہاں نے اپنْی دولت توں کوئی فیض نی پُجٖایا حالانکہ صرف دولت ای دنیا تے آخرت کیتے عزت و توقیر دی وجہ کینھی جے ایویں ہوندا تاں اھٖ قارون تے ہارون دا ناں لوک چمیندے پئے ہوندے لیکن ایویں لگٖدے جو اے لوگ تریخ دے سبق توں ان پڑھ ہن ۔ احٖ لوڑھ ہے جو اے لوک خانپور اچ تعلیمی ادارے تے ہسپتال قائم کرتے اپنْے آپ کوں لہور دے دیال سنگھ تے گنگا رام توں بہتر ثابت کرن۔
خانپور کیتے وفاقی ، صوبائی تے ضلعی حکومت توں ترقی دے ناں تے فنڈ دی امید رکھنْ فضول اے ، خانپور دا کوئی ایجھا نمائندہ کینھی جو اتھوں کجھ حاصل کر سگٖے ، جڈٖنْ جو ترقی کیتے واحد سہارا ، خانپور دی تحصیل ایڈمنسٹریشن ایجھے کمیں اچ اُلجھی ہوئی ہے جیندا آونْ آلی نسلیں کوں کوئی فیدہ کائنی ،تحصیل ایڈمنسٹریشن کوں چہیدے جو او اپنْی نگرانی اچ کیڈٹ سکول تے کیڈٹ کالج قائم کراوے ۔ کمرشل کالج دی بلڈنگ کیتے زمین تے ایلمنٹری کالج تے حلقہ 5 سکول دی زمین قبضہ مافیا توں چھڑاوے ۔ خانپور ووکیشنل انسٹیٹیوٹ برائے خواتین بحال کراوے ۔ خانپور ووکیشنل ٹریننگ سنٹر جینکوں صادق آباد منتقل کیا گٖئے واپس کرایا ونجٖے ،ایں طرح خانپور دا انفارمیشن آفس وزارت اطلاعات حکومت پنجاب توں بحال کرایا ونجٖے ۔ ترقی تعلیم کالج دے جنوب اچ واقع آبادی دے مکینیں کوں متبادل جاہ ڈٖے تے تمام زمین ترقی تعلیم کالج دے حوالے کیتی ونجٖے ۔ بٖیا اے جو ترقی تعلیم ڈگری کالج تے ڈگری کالج برائے خواتین کوں پوسٹ گریجویٹ کالج دا درجہ ڈٖیوایا ونجٖے ،۔ کیونجو جیکر معمولی آبادی دے شہر چشتیاں دے گرلز تے بوائے کالج پوسٹ گریجویٹ تھی سگٖدن تاں کثیر آبادی خانپور دے کالج کیوں نی تھی سگٖدے ؟ مزید اے جو دیہاتاں اچ تعلیمی ادارے تے انہاں تعلیمی ادارے اچ سٹاف دی عدم دستیابی دی طرف توجہ ڈٖتی ونجٖے ۔ تحصیل ناظم حاجی مراد خان ، جیندا تعلق خوش قسمتی نال جاگیردار کلاسنال کائنی کوں چاہیدے جو او اپنْی تحصیل خانپور کیتے یادگار تے مثالی کم کرنْ ڈٖوجھی صورت اچ انہاں دا انہاں وی انہاں لوکیں نال امسے جو سرائیکی وسیب کیتے مندا تے نفرت دی علامت بنْ چکئن۔٭
غرضیکہ۔۔۔غرض کہ
’’غرضیکہ وہ سب لوگ دوبارہ وہیں چلے گئے‘‘۔۔۔۔۔’’غرضیکہ‘‘ لکھنے کی مطلق ضرورت نہیں۔ ’’غرض کہ‘‘ کافی ہے۔ اِس کی جگہ’’اَلغرض‘‘ بھی لکھا جاسکتا ہے، مگر اُس میں عربی پن زیادہ ہے۔ ’’غرض کہ‘‘ مناسب ٹکڑا ہے۔ اِسی انداز کا ایک مرکّب لفظ’’گویا کہ‘‘ ہے۔ لوگ لکھتے ہیں۔ صرف ’’گویا‘‘ لکھا جائے ، تب بھی مفہوم پوری طرح ادا ہوجائے گا اور قواعد کے لحاظ سے کوئی خرابی پیدا نہیں ہوگی۔
یعنی کہ کبھی کبھی دیکھنے اور سننے میں آجایا کرتا ہے۔ اِس میں ’’ہ‘‘ زائد ہے، ’’یعنی‘‘ کافی ہے۔
ایک مشہور لکھنے والے نے لکھا تھا: ’’حال آنکہ انھیں شائع ہوئے ڈیڑھ صدی سے زیادہ کا زمانہ گزر چکا ہے۔’’زیادہ کا زمانہ میں’’کا‘‘ زائد ہے۔ ’’ڈیڑھ صدی سے زیادہ زمانہ گزر چکا ہے‘‘۔ لکھنا بہتر ہوتا۔
) حوالہ کتاب: ’’انشا اور تلفّظ‘‘۔۔۔۔۔رشید حسن خاں۔ص: (27