(Last Updated On: )
لازمی نی جو ساریں کوں ہک اَکھ نال ڈٖیکھنْ آلا سیانْا تے عادل ہووے۔کانْا وی تاں سبھنْاں کوں ہک اَکھ نال ڈٖہدے۔پر کئی اونکوں نہ سیانْا آہدے نہ عادل۔ پنجاب دا ہک راجہ وی جگ مشہور تھی گزریے۔ جیندے بارے آہدن جو رکھدا وی ہک اکھا ہا تے ڈٖہدا وی ہِک اَکھ نال ہا ، عادل تے سیانْا وی ہا۔ ساڈٖی وستی اِچ وی ہک راجہ وسدے جیرھا کہیں راجدھانی دا تاں نی پر اپنْے وسیب دا راحٖ ولایا ہویا ہوئے تے اے بچارا وی نِکیں لا دا ہک اکھاہے۔سارے وسیب دیاں اَکھیں ہوں ہک اَکھے کیتے ترساندیاں پیاں ہوندن ۔ او جیرھے آندے تاں ہک اَکھ نال ای ساریاں کوں مُنیندے تے ایں صفائی نال مُنیندے جو ڈٖوں اکھیںآلے اَکھیں پٹی بٖیٹھے رہندن۔وڈٖکے آہدن جو ایندی اکھ جٖماندروں ماری ہوئی ہے۔ پر آفرین اے اوندی ماء دی جئیں اوندا ناں نورنْ چارکھیے۔ حد تاں اوں مائی دی ہے جئیں اوندے نال اکھ مٹکا لاکر اہیں ایندا پاند اَن وٹھیا حالانکہ اوں مائی تے وی اَکھ نی تھاردی ۔
لوک اہدن جو اَکھ اوڈھر پہاڑ اوڈھرپر اَکھیں دے اوڈھر جو تھیوے سو تھیوے بعضے دل ضرور لَکھ ویندے۔اَکھ تو نْے دل کنوں پروبھری ہوندی اے پر دل نال ایندا خصوصی گٖانڈھا ہوندے۔بُزنگیاں تونْے اکھ مریندی اے پر لُنڈا دل کوں بھرنْا پوندے۔کریندی اکھ اے بھریندا دل اے۔ تونْے جو اے انصاف نی بھلا ڈھڈھ دی پیڑ آلاہنْیوں کیوں کڈھاوے۔حق تاں اے ہے جو کرے اَکھ تاں بھرے وی اَکھ۔سیانْے اَہدن جو دل بندے دا مکان ہوندے تے اَکھ دروازہ۔ ایں گھر اچ وَسنْ والا اَکھیں دے راہیں آندے کہیں ویلے ایں وی تھیندے جو دل اِچ وسنْ آلے دی سک اچ اَکھیں نت کیتے نوٹیج ویندن۔بعضے واری کہیں کوں کانْی اَکھ نال ڈٖیکھ کراہیں دل رَحٖ ویندے تے کہیں ویلے اَکھیں پٹ تے ڈٖیکھنْ نال وی کجھ نی نظر دا۔کجھ پہنتے ہوئے لوک ایجھے وی ہوندن جیرھے اکھیں نُوٹ تے وی ہر اُو شئے ڈٖیکھ گھندن۔جیرھی عام کُھلی اکھ نی ڈٖیکھ سگدی اکثر لوک اکھ نِجھا تے ٹردن اُنہیں دی وڈٖی تعریف تھیندی اے، حالانکہ جھِکی جھونْ سٹ تے ٹُرنْ آلے لوک ڈٖھٹیاں پوٹھیاں شئیں گٖولیندن۔ نوِی اکھ شرمندگی دا مظہر وی ہے تے ادب دا وی۔ اکھ یا تاں ظالم جابر دے اگٖوں نوِدی اے یا ذال دے اگٖوں جیرھے لوک انھاں دے اگٖوں اکھ نوائی نیں کریندے یا تاں انہاں دی اکھ نی رہندی یا عزت۔اَکھیں بِڑکدیاں ہونون یا دید گھٹ ودھ پوندی ہووے تاں وی ا کھیں نجھا تے ٹُرنْاں پوندے۔ٹردا تاں گھوٹ وی اکھیں نوا تے ہے تونْے جو انوندی دید سموری تے اکھ وی بِڑکدی نی ہوندی۔ اکھیں تاں کنوار اِی نوائی بٖیٹھی ہوندی اے پر جیرھے ویلے اوندیاں اکھیں پئے دیئیں اکھیں نال چار تھیندین تاں ایندے بعد ہمیش کیتے پئے دی اکھ اُچی نی تھیندی اَتے ذال دی اکھ جھکی نی تھیندی۔ کہیں کوںگُھور تے ڈٖیکھو یا اکھ پٹ تے یا کہیں کوں ڈٖیکھو تے اکھ جھمکائو شر ودھدے گھٹدا نئیں۔ اکھ بند تھیوے یا کھُلے اپنْی جاہ تے، شالا کہیں دی اکھ نہ لگٖے۔اکھ لگٖنْ نال ٹیشن وی چُک سگٖدے۔تمبالوں وی غرق تھی سگٖدے۔محبت وی تھی سگٖدی ہے ، اتے جنازہ وی پڑھیج سگٖدے۔ویسے کجھ گٖالھیں تے تاں اکھ رکھنْی پوندی اے تے ساڈٖے وسیب اچ ایجھے ڈھیر اکھیں آلے ملدن، جنھاں کہیں بٖے تے اکھ رکھی ہوئی ہوندی ہے۔ اُنویں تاں شریف دی اکھ ایجھی با اثر نی ہوندی جیجھی بدمعاش دی ہوندی ہے۔بدمعاش دی اکھ بٖے دی ہر چنگی چوکھی شئے تے ٹِکی تھئی کھڑی ہوندی ہے۔ شریف تاں شودا اپنْی شئے تے وی اکھ نی رکھ سگٖدا متاں کئی اکھیں کڈھ گھنے۔اَکّھڑ رَن دی پئے تے ایجھی کھؤری اَکھ ہوندی ہے جیویں بٖکری تے شیر دی اکھ۔اوئیں تاں امیر رَناں وی پئے تے نوکرانْی ڈٖوہاںتے تاڑو اَکھ رکھیندین۔اُنہاں دی تھوڑی جہیں وِسلائی گھر دے پِھڑتے میل سگٖدی ہے۔ پولیس آلیں کوں چوریں ،بدمعاشیں تے اکھ رکھنْی پوندی ہے۔چوریں کوں لوکیں دی مڈٖی تے اکھ رکھنْی پوندی ہے۔لوکیںکوں پہرے دار تے اَکھ اَتے پہرے دار کوں چور اُتے اَکھ رکھنْی پوندی ہے۔افسر دی اَکھ کلرک تے اَتے کلرک دی سائل دے کھیسے تے۔
بندہ تھیا ہک اکھیں تھیاں ڈٖوں ڈٖیکھنْ تھیا ۔نِت دا پچھے سنجٖانْ نہ تھیوے تاں گلہ کِتھ دا۔ اُنویں وی دیسی گھیو رہ نی گٖے۔قلمی تے گریسی گھیو کھا کھا تے اَکھیں بٖہہ گٖن ۔ دید گھملاٹ گٖئی اے۔سوائے مطلب دی شئے دے بٖیا کجھ نظر نی آندا۔اَکھ تاں شودی ہوندی ہئی اَپا پیپ اے۔ایندے اگٖوں جیرھی شئے آسے ایں ڈٖیکھنْے۔اَکھ تاں ککھ دی وی ہوندی ہے اتے لکھ دی وی۔ بھاہ ونجٖے تاں لکھ دی نہ بھانوے تاں ککھوں کھوٹی۔ساری کہانْی بھانونْ تے اَنْ بھانونْ اچ سمتّی کھڑی اے۔کہیں مجنوں کنوں پچھیا وئے تیڈٖی لیلیٰ کالی ،مجنوں ولدی ڈٖتی تیڈٖی اَکھ نی ڈٖیکھنْ والی۔
اے گٖالھ تاں ہے وی سچ جیکرائیں بندے دے اندر دی اکھ سُجٖاک ہووے تاں اوہ ہیر ے تے پتھر اچ سُنجٖانْ کر سگٖدی ہے۔ہُنْ ہیں گٖالھ کوں چا ڈٖیکھو جو ہر کوئی ہرنْ دی اکھ کوں سوہنْا آہدے۔ تے ہر سوہنْے دی اکھ کوں ہرنْ دی اکھ سنّواں گٖنْدے حالانکہ اکھ اچوں سوہنْی اکھ گٖڈٖا دی اَکھ ہوندی ہے۔ایڈٖی ٹھلہی تے ایڈٖی سوہنْی پر کئی ڈٖیکھنْ جٖاپنْ آلی اکھ ہووے تاں۔لوک تاں گٖڈٖا دی اکھ نال ڈٖہدن حالانکہ گٖڈٖاں کوں چھڑی گڈٖا دی نی، آپنْی اکھ نال ڈٖیکھنْا چاہیدے۔جذبیاں نال نی ۔انویں وی اَکھ اچ اَکھ پاتے ڈٖیکھو تاں ڈھیر سارے راز کھل ویندن بلکہ کئی واری خود آپنْیاں اکھیں وی کُھل ویندن تے ایجھیاں کُھلدن جو وت ملنْ دا ناں نی گھندیاں۔اکھ نال اکھ تاں ہر کہیں دی تے ہر ویلے رلدی ہے پر ایندے کیتے کہیں نہ کہیں دی استادی ضروری ہوونْی چاہیدی اے۔اکھیں رلنْ اچ تاں چِرّک نی لگٖدا پر نکھڑنْ اچ حیاتی کھپ ویندی ہے ۔کئی تاں ایڈٖے تیز ہوندن جو انہاں دیاں اکھیں ہُناں کنوں وی چوکھیاں تیز ہوندن بس پِھریاں نی تے گَھرپے لتھے نی۔ اکھ جتی تکھی چھری کیا ہوسے ویسے اکھ پھرے تاں ہکا گٖالھ اے جے چھری پھرے تاں وی ہکا گٖالھ ہے۔
اللہ سئیں دنیا تے ونکوں ونکی تے آعلو عال دیاں شئیاں بنْائن جینویں امبیں دیاں کئی ونکیاں ہن۔ ایویں کنوں مالٹیں تے بٖے تِرے پَھلیں دیاں کئی ونکیاں ہن۔ اینویں ای اکھیں دیاں وی کئی ونکیاں ہن۔ رنگیں دے حوالیاں نال بھوریاں اکھیں ککیاں اکھیں ،ککوریاں اکھیں۔ایجھیں اکھیں تے بعضے بیماری دا حملہ ہوندن تے بعض حملہ آور تھی کراہیں بیمار کر ڈٖیندن۔ وڈٖے ترائے ونکیں اچ چپچیاں مُچیاں اکھیں چھوٹیاں اکھیں تے موٹیاں اکھیں۔اُچیاں بے دیدیاں اکھیں ، کھوٹیاں اکھیں ، طوطیاں اکھیں ، چیرویاں اکھیں، پھیرویاںاکھیں،بلوری اکھیں،گلابی اکھیں،شرابی اکھیں،جِھکیاں اکھیں،تونْے جو ایجھیاں اکھیں۔ ادھ ڈٖوڈے جتلی جھکیاں ہوسن تے بھانویں نہ وی ہوسن پر شاعر حضرات تاں انہاں کوں سمندر کنوں وی چوکھیاں جِھکیاں لکھدن۔انہاں شاعراں ادیباں دا مشاہدہ تے ویورا اپنْی جا پر اکھیں تے سمندر دے پانْی اچ ہک قدر مشترک اے ہے جو ڈٖوہیں دا پانْی کھارا ہوندے۔ اکھیں دی ایں کائنات اچ پھیرویاں اکھیں دا ہک نوِلا مقام اے۔پہلی تاں گٖالھ اے ہے جو ایہہ شودیاں خدائوں پھیرویاں ہوندیں انھاں کوں بندے دا پھیرنْ نہ پھیرنْ ہک سنواں ہوندے ۔ اعتراض کرنْ آلے تاں اعتراض کرنْوں نی چُکدے ‘ ہر ڈٖیکھنْ آلا اے سمجھدے جو بھینگا میں ڈٖو ڈہدا کھڑے ‘حالانکہ بھینگا کہیں بٖے پاسے ڈہدا پیا ہوندے۔خیر اے تاں اونکوں قدرتی فائدہ حاصل اے۔ او بھانویں جہیں پاسے ڈٖیکھے کہیں کوں کیا پتہ۔ایندے نا ل کہیں کوں خوش فہمی وی تاں تھی سگٖدی اے جو مُرگ متارا شاید اُڈٖاہیں بھُلیا بٖیٹھے۔
اَکھ بت جُثے تے بھانویں جو کسیرے جتی جاہ ملیندی اے بلکہ ایں توں وی گھٹ‘ پر اے دھیلے جتی جاہ ملنْ آلی اَکھ جیکراہیں بَج لگٖی ہووے تاں حُسن وی حُسن نی جاپدا ہتھوں کوجھاتے بُسا ڈٖسدے۔وَتر ساک کیتے وی تاں اَکھ نک کوں مورہی اہمیت ڈٖتی ویندی ہے ۔ایہے اَکھیں اِی تاں ہوندن جیرھیاں سجٖنْیں دی آمد تے ٹھرٹھر ویندن۔ من بھاونْیاں کیتے تاں اکھیں وچھانونْ کوں دل کریندے سجٖنْ کول ہونون تاں عاشق لوک اَکھیں وتاونْ کنوں وی نی چکدے۔پر جیرھے ڈٖینہہ پِھر ویندے تاں سچے سجٖنْ وی اکھیں پھیر ویندن پچھے تاں ول اکھیں دا وَسنْ ڈٖیکھنْ آلا ہوندے۔ویسے ایجھے دوستاں تے اَکھ رکھنْی چاہیدی اے جیکراہیں ذری جیہی وی اَکھ نوٹ تھئی تاں انجام اُوں کبوتر سنواں ہوسے جیرھا بٖلی کوں ڈٖیکھ کراہیں اَکھیں چا نُوٹیندے تے سمجھدے جو شاید بٖلی وی میکوں نئیں پئی ڈہدی۔پتہ ہوں ویلے لگدے جیلے کبوتر دی سری بٖلی دے چک اچ ہوندی ہے۔
لہٰذا اوکھ تے مصیبت ویلے کہیں کوں وی اَکھیں نوٹنْیاں نی چاہیدیاں بلکہ اَکھیں پَٹ کھول کراہیں رکھنْیاں چاہیدن۔اَکھیں کھولنْ تے اَکھیں چاڑھنْ اچ وی فرق ہوندے تے کتھاہیں اَکھ مَٹکا تھی ونجٖے تاں سبھ توں پہلے کُھلی اَکھ بند تھیندی اے۔ اینویں تاں اَکھ اِچ پیا کٹر وی شتیر جٖاپدے۔ حیرانی تاں اے ہے جو اَکھ اِچ پیا کلنجرچُبھکار گھت کھڑدے پر اَکھ اِچ سمتّا بندہ ہاں ٹھریندے کھڑا۔بس دل آہدے جو اَکھیں دے اگٖوں اِی کوئی بٖیٹھا رہے پر دنیا کہیں کوں کہیں دے سامنْھے بٖیٹھا ڈٖیکھ نی سہندی تے اَکھیں پوڑ پوڑ تے ڈٖہدی ہے۔ دنیا تے کئی ونکیاں دے لوک ہوندن بعضے لوک تاں ہک اَکھ نی بھاندے تے بعضاں کیتے اَکھیں وِچھانونْ کوں دل کریندے ایجھے لوک نہ ڈٖسن تاں اَکھیں وَسنْ پئے ویندن۔جے اچاچیت ڈِٖسنْ تاں وی خوشی کنوں اَکھیں ترمنْ پئے ویندن۔ایجھے لوکاں نال اگر گلا الانبھا ہووے تاں وی ڈٖیکھنْ نال سبھ کجھ وانْ وٹیندے ویندا۔ کجھ آکھنْ وی چاہو تاں اکھیج نی سگٖیندا بس ایویں لگٖدے جینویں کہیں اکھ مُندر کر ڈٖتا ہووے۔ اُنویں وی کاوڑ کرنْی چنگٖی نی ہوندی۔کتھاہیں کاوڑ ڈٖکھاونْی پوندی ہے کتھائوں اَکھ نُوٹ کرنْی پوندی اے۔سیانْے اَہدن جو بھاندے دا سبھ کجھ بھاندے تے اَنْ بھاندے دی اَکھ نی بھاندی ۔ بندہ وڈٖا دل کرنْ پچھوں پووے تاں اَکھیں تے بھربھٹے بارنی لگٖدے پر اے گٖالھ اُوں ویلے چَھکدی اے جیلے بندے دیاں اَکھیں بٖے بھلیاں تے چھُڑتل نہ تھیاں ودیاں ہونون۔اُنویں اَکھ جا بے جانی لگٖدی جے لگٖدی وی ہے تاں اوں ویلے جیرھلے کتھاہیں نہ لگٖی ہوئی ہووے جے کتھاہیں لگٖی ہوئی ہووے وی تاں ولا او اَؤکھی لگٖدی ہے۔ پچھے اَکھیں تے نندر حرام بس اَکھ اِی ہوندی ہے جیرھی تارے گٖنْ گٖنْ تے رات ٹپیندی ہے۔بس کہیں نال لگٖی اَکھ کڈٖاہیں نی لگٖ سگٖدی تے کہیں نال لگٖی اَکھ لحظے لحظے لگٖی رہندی ہے۔سیانْے آہدن جو اَکھ تے تیر تونْے جو مختلف النسل ہوندن پرڈٖوہائیں دا کم ہکو سنواں ہوندے ۔ اے وی ہاں دے پار تے او وی ہاں دے پار ۔سبھے گٖالھیں سچیاں پرا ے وی کوڑ نی جو جیرھا کم اَکھ کر سگٖدی ہے او کئی ہتھیار نی کر سگٖدا ۔کئی لوک زبان ہلائیں بغیر اَکھیں دے اِشاریاں تے تل ویتریاں نال اِی کم کڈھا گھندن۔اکھیں نال کم کڈھانونْ وی کہیں ایرے غیرے دا کم نی بس اے فن جینکوں آویندے سو آویندے۔ہرکم دا کئی نہ کئی چجٖ ہوندے ہر بندہ وی تاں ہر چجٖ نی کر سگٖداتے اکھ دا چجٖ تاں ہوندا وی اوکھا ہے۔ بھلا کئی اکھ اچ کجلا ٹھہا تے سَؤرھے دی سورکھ سگٖدے ۔ اَکھ دے گُٖنْ تاں اے ہن جو بندے داساہ وی مکلا ونجٖے تاںاَکھ تاربٖدھ ویندی ہے۔بندے کوں چھیکڑی مکلاوا اَکھ اِی ڈٖیندی اے۔موئے بندے دی تصدیق وی تاں اَکھ اِچ اَکھ پاتے کیتی ویندی ہے۔
ڈاکٹر وی تاں صفراء دا پیرا کُھرا اَکھیں اچ گٖولیندے۔اَکھیں تے اونویں تاں بٖہوں کجھ لکھیا ونجٖ سگٖیندے ۔میڈٖی اَکھ اچ پھُٹدے بج دی اَکھ وی ہے تے وَنْیں دی اَکھ وی‘ سیہڑ تے گُلر دی اَکھ وی قابل ذکر ہے جیرھی جٖانونْ دے ڈھیر عرصہ بعد کُھلدی اے پر سنجٖانْ ایجھی رکھیندی ہے جو کیا اکھیجے ۔ دنیا تے اوہے لوک کامیاب رہندن جیرھے ویلے تے اَکھ رکھیندن۔اکھ نی تاں ککھ نی ، اکھ اے تاں لکھ اے۔
٭٭٭
مریم گھوٹیہ
مریم گھوٹیہ