<p dir="rtl">اس سے پہلے<br /> پھول باسی ہو جائیں<br /> وہ<br /> مجھے مرا ہوا دیکھنا چاہتے ہیں<br /> وہ میری میت پہ<br /> مرے ہوئے پھول نہیں ڈالنا چاہتے<br /> مگر مجھ پہ<br /> مرے ہوئے نوحے لکھ لکھ کر<br /> مجھ سے جوڑے رشتے پہ تھوکتے<br /> لعنت بیجھتے<br /> کرلاتی ہوئی آواز میں بین کرنا چاہتے ہیں<br /> میری ٹکٹکی پہ بندھی زندگی<br /> ان کہی آہنی ضربوں سے <br /> ہمیشہ خونچکاں رہی ہے<br /> لیکن میں نے کبھی<br /> بڑھ کر دروازہ نہیں کھولا<br /> لیکن اب <br /> ٹوٹی دیوار میرے کمرے تک آگئی ہے<br /> تماش بین پونوں میں روٹیاں باندھے<br /> مجھے سنگسار ہوتا دیکھنے کے لیے<br /> جوق در جوق آرہے ہیں<br /> ۔۔۔۔۔۔۔۔<br /> " پانی کے چند گھونٹ ملیں گے؟"<br /> میں نے<br /> قلم نما خنجر پکڑے قاتل سے پوچھا<br /> "ابھی کچھ دیر انتظار کرو<br /> مرنے سے پہلے تمہاری آخری<br /> خواہش پوری کردی جائے گی"<br /> قاتل نے قلم نما خنجر سے<br /> قصیدہ لکھتے ہوئے کہا<br /> " تم<br /> مجھے کب مارنا شروع کرو گے؟" <br /> " آغاز ہو ہو چکا ہے<br /> مکمل بھی مار دیں گے<br /> مجھے قصیدہ مکمل کرنے دو"<br /> قاتل نے قلم نما خنجر <br /> ایک طرف رکھتے کہا<br /> " ایک بات تو بتاو<br /> تم کالی سیاہ<br /> زمین کی کوکھ سے پیدا ہو کر<br /> روشن نظمیں کیسے لکھ لیتے ہو؟<br /> اور یہ بھی بتاو<br /> کیسی موت پسند کرو گے؟"<br /> " میرے اندر<br /> سمندر کی آخری تہہ کی مچھلیاں ہیں<br /> جن کی آنکھیں نہیں ہوتی<br /> مگر جو تمہارے<br /> اس قلم نما خنجر کی دھار سے زیادہ<br /> روشن ہوتی ہیں<br /> اور ۔۔۔۔۔۔<br /> میں بہت آہستہ آہستہ مرنا چاہتا ہوں<br /> تاکہ تم کو ہمبا سکوں"<br /> میرا جواب سن کر<br /> روٹی سے خالی پونے پکڑے تماش بین<br /> زور دار قہقہے لگانے لگے<br /> اور<br /> قاتل کے قلم نما نوک دار خنجر پہ<br /> کھسیانی ہنسی معلق ہو کر رہ گئی<br /> ۔۔۔۔۔۔۔۔۔۔<br /> نوٹ فطرت سوہان نے محمود درویش کی نظم<br /> They want to see medead <br /> سے متاثر ہو کر ایک نظم لکھی" آخری نظم" اور دونوں مجھے میل کر دیں۔ میں دونوں نظموں سے اتنا متاثر ہوا کہ یہ نظم لکھ دی</p> <p dir="rtl"> </p>
